Мәжіліс депутаты Болатбек Әлиев мемлекеттік инвестициялар ағыны туралы айтып, Қазақстанда одан нақты кімдер пайда көріп отырғанын түсіндіруге тырысты, деп хабарлайды Ulysmedia.kz.
ТОЛЫҒЫРАҚ
Депутаттың айтуынша, бүгінде Қазақстандағы реттелетін сатып алулардың жылдық жиынтық көлемі шамамен 30 триллион теңге. Бұл мемлекет заң аясында бақылайтын барлық саланы қамтиды: құрылыс, инфрақұрылым, жолдар, әлеуметтік нысандар, тұрғын үй, мемлекеттік компаниялар мен жер қойнауын пайдаланушылардың сатып алулары.
- Бұл – елдің дамуын қамтамасыз етіп қана қоймай, қазақстандықтарға жұмыс, тұрақты табыс және ертеңгі күнге сенім беруге тиіс орасан қаражат. Алайда шынайы көрініс басқаша. Кейбір компанияларда штатта бірнеше ондаған, ең көп дегенде бірнеше жүз қызметкер бар, бірақ соған қарамастан олар ондаған және жүздеген миллиард теңгелік ондаған жобаларға қатысып отыр: мемлекеттік тапсырыспен мыңдаған пәтер салады және сатып алады, әлеуметтік нысандардың мердігері, сумен және жылумен қамту, мектептер, ауруханалар мен инфрақұрылым жобаларын орындайды, әрі ірі квазимемлекеттік компаниялардың жүздеген миллиард теңгелік тапсырыстарын қатар орындауда! Логикалық сұрақ туады: осындай аз адаммен мұндай көлемдегі жұмысты физикалық тұрғыда жүзеге асыру мүмкін бе? Жауап айқын – мүмкін емес, дейді Әлиев.
Демек, депутаттың сөзінше, көлеңкелі схема бар
- Нақты орындаушылар – салық, әлеуметтік және зейнетақы аударымдары төленбейтін еңбек мигранттары мен тіркелмеген жұмысшылар. Бұдан да алаңдатарлығы – мемлекеттік органдардың үнсіздігі мен әрекетсіздігі осындай тәжірибені іс жүзінде қолдап отыр, – деді депутат.
ФОРМАЛДЫ БАҚЫЛАУ
Формалды түрде елімізде отандық тауар өндірушілерге және қазақстандық қамтуға (тауарлар, жұмыстар, қызметтер) басымдық берілген.
- Бұл мәселелер өнеркәсіп және құрылыс министрлігінің құзырында, бірақ іс жүзіндегі бақылау көбіне формалды сипатта. Сонымен қатар жауапкершілікті басқа ведомстволар да бөліседі: еңбек және халықты әлеуметтік қорғау министрлігі – нақты жұмыспен қамтуды және еңбекақы қорын бақылауға, ал салық органдары – жеке табыс салығын, әлеуметтік жарналар мен медициналық сақтандыруды қадағалауға тиіс, дейді депутат.
Егер осы қаражаттың бәрі қазақстандықтардың қалтасында қалса, біз жұмыссыздықтың азайғанын, әлеуметтік төлемдердің қысқарғанын және керісінше – нақты экономикада еңбек ететін азаматтардың көбейгенін көрер едік.
- Әсіресе, президент жариялаған жұмысшы мамандықтар жылы аясында миллиардтаған теңге оқытуға жұмсалып жатқан кезеңде бұл аса маңызды. Бұл – нағыз мультипликативтік әсер. Мен осы бағытта белгілі бір жұмыстар жүргіздім, соның ішінде аталған министрліктермен де. Бұл мәселе экономикалық блок бойынша вице-премьер Серік Жұманғаринмен егжей-тегжейлі талқыланды. Менің ойымша, біз оны экономикалық және әлеуметтік саясаттың негізгі тақырыбы ретінде күн тәртібіне шығара аламыз, дейді Болатбек Әлиев.
Депутат мемлекеттік ақша – жай ғана бюджет сандары емес екенін айтады.
- Бұл – жүздеген мың қазақстандық отбасының еңбегі, тұрақтылығы мен ертеңгі күнге сенімі. Әрбір теңге ел экономикасына қайта оралып, біздің азаматтарымызға, олардың отбасылары мен Қазақстанның болашағына жұмыс істеуі тиіс, – деп түйіндеді Әлиев.
