«Қазгидромет» синоптиктері 2025 жылғы 22 қазан күні Қазақстанның 14 өңіріне ауа райы болжамын жасады, деп хабарлайды Ulysmedia.kz.
Маңғыстау облысында өрт қаупі жоғары деңгейде сақталып отыр. Ақтауда да жағдай осындай — жоғары өрт қаупі байқалады.
Атырау облысының солтүстігінде, шығысында және орталығында түнде және таңертең тұман күтіледі. Сондай-ақ өңірдің солтүстігінде, оңтүстігінде және шығысында төтенше өрт қаупі, ал солтүстік-шығысы мен оңтүстік-шығысында жоғары өрт қаупі сақталады. Атырау қаласында да түнде және таңертең тұман болады.
Жамбыл облысының таулы аймақтарында түнде және таңертең тұман түседі. Солтүстік-шығыстан соғатын желдің екпіні солтүстік-шығыста және таулы аудандарда 15–20 м/с дейін жетеді. Өңірдің батысы мен солтүстігінде төтенше, ал орталығында жоғары өрт қаупі сақталады.
Батыс Қазақстан облысының солтүстік-шығысында кей жерлерде қатты жаңбыр жауады. Түнде және таңертең батысы мен солтүстігінде тұман күтіледі. Оңтүстігінде төтенше өрт қаупі сақталады. Жел оңтүстік-шығыстан соғып, түнде шығысы мен оңтүстігінде 15–20 м/с дейін күшейеді. Орал қаласында да түнде және таңертең тұман түседі.
Абай облысының солтүстігінде түнде және таңертең тұман күтіледі. Ал оңтүстігінде өрт қаупі жоғары деңгейде сақталады.
Қарағанды облысында шығыстан соғатын желдің жылдамдығы шығысында және оңтүстігінде 15–20 м/с дейін күшейеді.
Ұлытау облысында өрт қаупі жоғары, ал өңірдің оңтүстігінде төтенше өрт қаупі сақталады. Жезқазғанда да өрт қаупі жоғары деңгейде болады.
Ақтөбе облысының оңтүстігі мен шығысында өрт қаупі жоғары, ал батысы, солтүстік-шығысы және орталығында төтенше өрт қаупі сақталады.
Қызылорда облысында төтенше өрт қаупі байқалады. Өңірдің солтүстігі мен орталығында өрт қаупі жоғары деңгейде, Қызылорда қаласында да жағдай осындай.
Қостанай облысының солтүстігі мен шығысында түнде және таңертең тұман күтіледі. Шығыстан соғатын жел күндіз оңтүстігінде 15 м/с дейін күшейеді. Оңтүстігінде төтенше, ал оңтүстік-батысында жоғары өрт қаупі сақталады.
Жетісу облысында оңтүстік-шығыстан соғатын жел Алакөл көлдері маңында 15–20, кейде 25 м/с дейін күшейеді. Түнде өңірдің солтүстігі мен орталығында 1–3 градус үсік күтіледі. Талдықорғанда да түнде 1–3 градус үсік болады.
Павлодар облысының батысында, солтүстігінде және шығысында түнде және таңертең тұман түседі. Павлодар қаласында да осындай ауа райы күтіледі.
Солтүстік Қазақстан облысының солтүстігі, шығысы және оңтүстігінде тұман түседі. Петропавл қаласында да түнде және таңертең тұман болады.
Ақмола облысының солтүстігі мен шығысында түнде және таңертең тұман күтіледі. Ал оңтүстік-батысында өрт қаупі жоғары деңгейде сақталады. Көкшетауда да түнде және таңертең тұман байқалады.
