Қазақстанда тағы бір мұнай өңдеу зауыты салынады

Сенаторлар премьерге Маңғыстау облысында авиациялық керосин өндіруге маманданған МӨЗ салу туралы ұсыныспен сұрау жолдаған. Осы бастамаға жауап ретінде Бектенов Қазақстанда төртінші ірі мұнай өңдеу зауытын іске қосу жоспарланғанын нақтылады.

СИПАТТАМАСЫ

Жаңа зауыттың қуаты жылына 10 миллион тонна болады. Техникалық тапсырмаға жобаның қатысушыларын анықтау және кемінде төрт ықтимал орналастыру алаңын зерттеу енгізілген, олардың қатарында Маңғыстау облысы да қарастырылуда.

МЕРЗІМДЕРІ

Жұмыс бірнеше кезеңге бөлінген:

• 2028–2030 жылдары – техникалық-экономикалық негіздеме әзірлеу
• 2030–2032 жылдары – жобалық-сметалық құжаттама дайындау
• 2032–2040 жылдары – құрылыс

БҰҒАН ДЕЙІН

Энергетика министрі Ерлан Ақкенженов 2040 жылға дейін мұнай өңдеу саласын дамыту тұжырымдамасы аясында үш жұмыс істеп тұрған МӨЗ-дің жиынтық қуатын жылына 18 миллион тоннадан 29 миллион тоннаға дейін арттыру жоспарланып отырғанын мәлімдеген. Алайда, оның айтуынша, бұл көлемнің өзі елге жеткіліксіз болуы мүмкін. Сондықтан ол төртінші МӨЗ жобасы бойынша жұмыстарды бастауды ұсынды.