Белгород облысында кісі өлтіру және зорлау күдігімен іздеуде болған ресейлік әскери қызметкер Алексей Кострикин ұсталды. Ұсталған кезде ол жарақат алған, деп хабарлайды Ulysmedia.kz.
5 ҚАРАШАДА ҚОЛҒА ТҮСТІ
5 қараша, сәрсенбі күні «Пепел» және «Фонарь» жергілікті басылымдарының хабарлауынша, бейбіт тұрғындарды өлтіріп, зорлады деген күдікке ілінген ресейлік әскери қызметкер Алексей Кострикин Белгород облысында қолға түсті.
Басылым деректеріне сүйенсек, қатардағы жауынгер Кострикин Шебекин ауданына қарасты Вознесеновка ауылындағы дүкен маңында ұсталған. Ол сол жерде алкоголь сатып алмақ болған. «Қашқын дүкенге сыра алу үшін кірген сәтте, сәтті сәйкестікпен оған әскери қызметкерлер келіп жеткен», — делінген хабарламада. Ұстау кезінде Кострикин жараланған.
БАСА-КӨКТЕП КІРІП, ЕР АДАМДЫ ӨЛТІРІП, ӘЙЕЛІН ЗОРЛАҒАН
Ресейдің Тергеу комитеті (ТКР) Алексей Кострикиннің 30 қазанда ұсталғанын хабарлады. Тергеу нұсқасы бойынша, ол Новая Таволжанка ауылындағы жеке үйге кіріп, үй иесін өлтіріп, оның әйелін — мектеп мұғалімін — зорлаған. Осыдан кейін Кострикин оқиға орнынан қашып кеткен, бірақ кейін ұсталған.
Жергілікті БАҚ-тың жазуынша, бұл қылмысқа басқа да ресейлік әскери қызметкерлер қатысқан, олар да іздестіріліп жатыр. 1 қарашаға қараған түні Кострикин Белгородтағы қамаудан қашып, көлік ұрлап кеткен. Кейінірек оның Новая Таволжанкадағы тағы бір кісі өлтіруге қатысы бар-жоғы тексеріліп жатқаны белгілі болды.
БҰҒАН ДЕЙІН
«Агентство.Новости» басылымы Алексей Кострикиннің зорлау, ұрлық, қарақшылық және есірткі сақтау баптары бойынша сотталғанын жазған. Ол кемінде үш қылмыстық іс бойынша айыпталған және кейін РФ Қорғаныс министрлігімен келісімшартқа отырып, Украинаға қарсы соғысқа аттану арқылы колониядан босап шыққан.
