7 қараша күні Өскемен қаласының орталық бөлігінде 80-нен астам тұрғын және әкімшілік ғимарат жылусыз қалды, деп хабарлайды Ulysmedia.kz.
ТОЛЫҒЫРАҚ
Бұған жылу магистраліндегі жөндеу жұмыстары себеп болған.
«Шығыс Жылу» компаниясы жүйені іске қосу кезінде анықталған ақаудан кейін ысырма арматураны ауыстыру қажеттілігі туындағанын хабарлады. Жөндеу жұмыстары №668 жылу камерасынан бастау алатын учаскеде жүргізілді. Бұл желілер «Анура», «Әлем», «Кайнар», «Жәрдем» сауда үйлерін, сондай-ақ «Қазақтелеком» мен қалалық полиция басқармасының нысандарын жылумен қамтамасыз етеді.
«Шығыс Жылу» АҚ Октябрь ауданының басшысы Ринат Мұхамеджановтың айтуынша, тұтынушылар балансына тиесілі желілердегі монтаждау жұмыстары аяқталғаннан кейін кері құбырдың кіреберісінде ақау анықталған. Ірі апаттың алдын алу мақсатында бұл учаскені уақытша ажырату және арматураны ауыстыру туралы шешім қабылданған.
Компания жылу беру кезең-кезеңімен қалпына келтірілетінін нақтылады. Қазіргі уақытта тұтынушыларға кіреберістер ашылып, жүйені толтыру жұмыстары жүргізілуде. Тұрғындар пәтерлердегі температураның айтарлықтай төмендегенін айтқанымен, көпшілігі жағдайға түсіністікпен қарап, бастысы — бұл үзіліс ұзаққа созылмаса екен деген пікір білдірді.
