Ақтөбе тұрғындары жоғары температура мен жөтелмен өтетін ауыр тұмау жағдайларының көбейгенін айтады. Дәрігерлер маусымдық гонконг вирусының таралып жатқанын растады, деп хабарлайды Ulysmedia.kz. "Диапазонға" сілтеме жасап.
АҚТӨБЕДЕ НАУҚАСТАР КӨБЕЙГЕН
Ақтөбеліктер тұмаудың әдеттегіден ауыр өтіп жатқанын жиі айтып жүр. Қала тұрғындарының айтуынша, балалар да, ересектер де ауырып жатыр — дене қызуы 38 градустан жоғары көтеріліп, қатты жөтел мен әлсіздік байқалады. Ата-аналар балалардың бұл ауруды өте ауыр өткеріп жатқанын атап өтуде. Жергілікті тұрғынның сөзінше, бір балабақшада «топтың жартысы дүйсенбі күні сырқатқа байланысты келмеген».
«ГОНКОНГ» ВИРУСЫ РАСТАЛДЫ
Санитарлық-эпидемиологиялық бақылау департаменті журналистерге қалада шынымен де гонконг вирусы — А тұмауының H3N2 тармағы анықталғанын растады. Алайда мамандар бұл штаммның жаңа емес екенін атап өтті. «Бұл — жыл сайын күз-қыс мезгілінде айналымда жүретін маусымдық тармақ. Ол жаңа емес және бұрыннан белгілі маусымдық тұмау штаммдарына жатады», — деп мәлімдеді ведомство.
Облыстық денсаулық сақтау басқармасы 12 қарашадағы жағдай бойынша H3N2 вирусының 11 зертханалық расталған жағдайы тіркелгенін нақтылады.
