Бішкек қаласының әкімдігі 22:00-ден кейін мәдени-ойын-сауық мекемелерінің жұмысын тоқтату туралы қаулы шығарды, деп хабарлайды Ulysmedia.kz.
ТОЛЫҒЫРАҚ
Мұндай қатаң шаралар «Тыныштық туралы» заңды орындау мақсатында қабылданған.
«Аталған қаулыға сәйкес, Бішкек қаласы аумағындағы қоғамдық тамақтану орындары мен мәдени-ойын-сауық мекемелерінің (оның ішінде кафе, мейрамхана, бар, клуб, банкет залы және басқа да нысандар) басшылары барлық салтанатты, мәдени-ойын-сауық шараларын тоқтатуға және көрсетілген мекемелердің жұмысын 22:00-ден кешіктірмей аяқтауға міндетті. Электр қуатын тұтынатын барлық құрылғылар, әсіресе көп энергия жұмсайтын (электр плиталары, жылытқыштар, пештер) құралдар 22:00-ден кейін өшірілуі тиіс», – делінген әкімдік хабарламасында.
Сонымен қатар, әкімдік тұрғын үйлерден алыс орналасқан нысандарға «Тыныштық туралы» заң талаптарын толық сақтаған жағдайда электр генераторларын пайдалануға рұқсат береді.
Қырғызстанда «Тыныштық туралы» заң 2024 жылдың желтоқсанында қабылданған. Бұл заңда 22:00-ден кейін іс-шаралар өткізуге тыйым салынбаған, алайда қатты музыканы қолдануға шектеу қойылғанын хабарлады Kaktus Media.
ЭЛЕКТР ҚУАТЫН ӨШІРЕДІ
Бүгін Ұлттық қауіпсіздік мемлекеттік комитетінің төрағасы Камчыбек Ташиев бұл заң елде іс жүзінде орындалмай жатқанын айтып, ауызша тапсырма берді: 13 қарашадан бастап барлық кафе мен мейрамханалар 22:00-ден кейін жұмыс істемеуі тиіс. Әйтпесе, электр қуаты өшіріледі.
