Соңғы күндері теңге нығайып келеді. Алайда ұлттық валютаның ұзақ мерзімдегі жағдайы қандай болатынын Ұлттық банк нақты болжай алмайды, деп хабарлайды Ulysmedia.kz.
Бұл – нарықтың өз ықпалы
Қазақстан қаржыгерлерінің конгресі аясында Ұлттық банк төрағасы Тимур Сүлейменов журналистерге реттеуші ұлттық валютаның бағамына араласпайтынын түсіндірді. Оның айтуынша, теңгенің күшеюі немесе доллардың арзандауы – толықтай нарықтағы процестердің нәтижесі.
– Теңге фундаменталды факторларға байланысты күшейеді немесе әлсірейді. Біз бағамды реттемейміз, ол сұраныс пен ұсынысқа қарай қалыптасады, – деді Сүлейменов.
Алда не күтіп тұр?
Қазіргі таңда жағдай теңге үшін қолайлы. Бұл – валюталық түсімдердің түсуі, мұнай бағасының салыстырмалы түрде жоғары болуы және Ұлттық қордан бөлінетін трансферттермен байланысты.
Алайда мұндай үрдістің қанша уақытқа созылатынын Ұлттық банк айта алмайды.
