Қараша айының соңында АҚШ ұсынған Ресей мен Украина арасындағы соғысты тоқтату жоспары қызу талқыланды. Алғашқы нұсқада Киевке Донецк пен Луганск облыстарынан, соның ішінде әлі басып алынбаған аймақтардан бас тарту ұсынылған. Бұл жерлерді Ресейдің бақылауындағы «демилитаризацияланған аймаққа» айналдыру көзделген еді. Қатты сыннан кейін құжат қайта қаралып жатыр, деп хабарлайды Ulysmedia.kz.
ДОНЕЦКТЕГІ ЖАҒДАЙ
Қазір Украина бақылауында Донецк облысының төрттен бір бөлігі ғана қалды. Мұнда шамамен 200 мың адам тұрып жатыр. Үнемі атқылау мен байланыс қиындықтарына қарамастан, халық туған жерін тастамаған.
ЭВАКУАЦИЯҒА СҰРАНЫС АРТТЫ
«Дорога жизни» жобасының өкілі Анастасия Махник соңғы аптада эвакуацияға өтініш күрт көбейгенін айтады. Әсіресе Краматорск пен Славянск тұрғындары көмек сұрай бастаған. Көбіне балалармен отбасылар мен қарттар соңғы сәтке дейін үміттеніп, кетуді кейінге қалдырады.
ХАЛЫҚТЫҢ СЕНІМІ
Көпшілік Украина билігі халықты тастап кетпейді деп сенеді. Дегенмен билікке деген сенімсіздік бар. Ресейдің кепілдігіне де ешкім сенбейді. Негізгі себеп – майданның жақындауы, қыс мезгілі және үйлердің қирауы.
БОЛАШАҚҚА БЕЛГІСІЗДІК
Қайырымдылық ұйымдарының өкілдері соңғы уақытта қауіпсіздеу аймақтардан да адамдардың кетіп жатқанын айтады. Себеп – ресейлік оккупациядан қорқу. Көпшілік «екі күнде кетіңдер» деген сценарийді ойлап, алдын ала дайындалып жатыр. Ал майданға жақын қалаларда халық негізінен азық-түлік тапшылығы мен инфрақұрылымның қирауына байланысты көшуде.
БИЗНЕСТІҢ ҚИЫНДЫҒЫ
Краматорскіде кофейня ашқан кәсіпкер Максим Лысенко қазір бизнесін Киевке көшіруді ойлап жүр. Ол Донбасты Ресейге беру идеясын «абсурд» деп санайды. Оның пікірінше, бұл бейбітшілікке емес, Ресейдің қайта топтасып, шабуылды жалғастыруына жол ашады.
«АУМАҚ ЕМЕС, АДАМДАР»
Дружковкадан шыққан Екатерина Коваль да бұл ұсынысты қабылдауға болмайды дейді.
«Бұл бос жер емес, адамдардың өмірі. Қарттар, үйін тастай алмайтындар бар. Егер Ресейге берілсе, бұл Украина үшін капитуляция болады», – дейді ол.
ҚОҒАМДЫҚ ПІКІР
Киев халықаралық әлеуметтану институтының сауалнамасына сәйкес, украиндардың 71 пайызы Ресейге әлі басып алынбаған аймақтарды беруге қарсы. Шығыста бұл көрсеткіш 47 пайызды құрайды, ал 24 пайызы бейбітшілік үшін жерден бас тартуға дайын екенін айтқан.
