Алматыда Қабанбай батыр көшесі, 15 мекенжайында орналасқан Exclusive Residence тұрғын үй кешенінің тұрғындары жақын маңдағы кәуапханадан шығатын қалың түтін, күйік иісі мен шуды айтып шағымданды, деп хабарлайды Ulysmedia.kz.
МӘН-ЖАЙ
Тұрғындардың айтуынша, «Грузинский двор», Modi және «Мирас» атты қоғамдық тамақтану орындарынан үнемі түтін тарап, терезені ашу мүмкін болмай қалған. Алайда мәселе тек жағымсыз иіспен шектелмей тұр. Олардың сөзінше, түн сайын мас адамдар айқайлап, шу шығарып, тіпті төбелесіп қалады.
– Бізге маза бермейді, – дейді тұрғындар.
КОНТЕКСТ
Еске салайық, бұған дейін Алматы мәслихатының жаңа экологиялық талаптарды енгізу жөніндегі жобасы талқыланған еді.
Сол кезде кәуапханалар мен монша кешендерінде көмір пайдалануға тыйым салып, мұндай нысандарды толығымен газға көшіру ұсынылған еді. Бұл ауа сапасын жақсарту және қатты отынды қолданатын нысандарға бақылауды күшейту үшін жасалған.
