Германия Украинаға қару-жарақ алуға қосымша қаржы бөледі, деп хабарлайды Ulysmedia.kz.
ТОЛЫҒЫРАҚ
Германия қазан айында 500 миллион АҚШ доллары көлеміндегі қару-жарақ пакетін қаржыландырған болатын. Енді Нидерланд, Норвегия және Польша мемлекеттерімен бірлесіп тағы екі жаңа пакетке жалпы көлемі 1 миллиард доллар бөлінеді.
Германия сыртқы істер министрі Йоханн Вадефуль (Johann Wadephul) 3 желтоқсанда Брюссельде өтетін НАТО (North Atlantic Treaty Organization – Солтүстік Атлантикалық келісім ұйымы) елдерінің сыртқы істер министрлері кездесуінің алдында мәлімдегендей, Украинаға америкалық қару-жарақ сатып алу үшін қосымша 200 миллион доллар (шамамен 172 миллион еуро) бөлінеді.
Бұл қаражат PURL (Prioritised Ukraine Requirements List – Украинаға арналған басым сұраныстар тізімі) бағдарламасы аясында беріледі. Бағдарлама 2025 жылдың жазынан бастап іске қосылған және НАТО мен АҚШ президенті Дональд Трамптың келісімімен жүзеге асуда.
PURL механизмі енгізілгеннен кейін Германия қазан айында 500 миллион долларлық қару-жарақ пакетін қаржыландырды. Алдағы уақытта Нидерланд, Норвегия және Польша мемлекеттерімен бірге тағы 1 миллиард долларлық екі пакет қаржыландырылмақ.
200 миллион доллардан бөлек, Германия НАТО қорына қосымша 25 миллион еуро аударады. Бұл қаражат украиналық әскери қызметкерлерді қыс мезгілінде қажетті жабдықпен қамтамасыз етуге және медициналық көмек көрсетуге бағытталады.
Украина президенті Владимир Зеленский 17 қыркүйекте PURL бағдарламасы аясында елдің 2 миллиард доллардан астам қару алғанын, ал жыл соңына дейін жалпы көлемі 3–3,5 миллиард доллар болатын қару-жарақ жеткізіледі деп үміттенетінін айтқан. Бұл қаржыға Patriot әуе қорғаныс жүйесіне арналған зымырандар және HIMARS реактивті залптық жүйелері сатып алынған.
НАТОНЫҢ КЕЗДЕСУІ
3 желтоқсанда Брюссельде НАТО бас хатшысы Марк Рютте альянсқа мүше елдердің сыртқы істер министрлерімен кездеседі. Жиынға Украина сыртқы істер министрі Андрей Сибига және Еуропалық Одақтың сыртқы саясат жөніндегі жоғары өкілі Кая Каллас қатысады деп күтілуде. Бұған дейін АҚШ мемлекеттік хатшысы Марко Рубио бұл шараға қатысудан бас тартқан еді.
