Еуропалық одақ елдерінің тұрақты өкілдері 2027 жылдың соңына дейін Ресей газын толық импорттаудан бас тартуды көздейтін регламенттің келісілген нұсқасын бекітті, деп хабарлайды Ulysmedia.kz.
ТОЛЫҒЫРАҚ
Бұл туралы 10 желтоқсанда ЕО Кеңесіне 2025 жылдың соңына дейін төрағалық ететін Данияның баспасөз қызметі хабарлады. Дат тараптың мәліметінше, құжатты ЕО-ға мүше 27 елдің 25-і қолдаған. Регламентте ресейлік сұйытылған газ бен құбыр арқылы жеткізілетін газдан толық бас тарту мерзімдері, кестені бұзғандар үшін жауапкершілік шаралары, сондай-ақ ресейлік мұнай импортына толық тыйым салу нормалары бекітілген, деп жазады DW.
САНКЦИЯ
Санкциядан айырмашылығы — жаңа регламент белгілі бір шартпен қайта қаралмайды және ресейлік газды импорттауға тұрақты түрде толық тыйым енгізеді. Дания өкілдері DW-ге түсіндіргендей, дәл осы сипат құжатты ЕО-ның санкциялық шешімдеріне қарағанда әлдеқайда тұрақты етеді. Бұған қоса, сыртқы саясат санкцияларынан өзгеше, сауда шараларын қабылдау үшін ЕО-ға мүше барлық елдің бірауыздан келісімі талап етілмейді. Венгрия мен Словакия бастаманы қолдамаған, себебі олардың экономикалары әлі де Ресейден келетін құбырлық газға тәуелді.
АЛДАҒЫ ҚАДАМДАР
Ресей газынан толық бас тарту туралы келісімнің мәтіні 10 желтоқсанда жарияланады. Кейін оны Еуропарламент мақұлдауы тиіс, одан соң құжат ЕО Кеңесі арқылы ресми түрде бекітіледі.
КОНТЕКСТ
Ресей Украинаға кең ауқымды басқыншылық бастағаннан кейін ЕО елдері ресейлік газдан тезірек бас тарту қажеттілігімен келісті, алайда бұл процесс іс жүзінде баяу жүрді. 2025 жылғы қазан айына қарай ЕО импортындағы ресейлік газдың үлесі 12%-ға дейін төмендеді. Ал соғысқа дейін ол 45%-дан аса болатын. Айта кетсек, бұған дейін ЕО-ның төрт мемлекеті Ресейге газ үшін Киевке бөлген қаражатынан көбірек төлем жасағаны хабарланған.
