Еуропалық комиссия төрағасы Урсула фон дер Ляйен Дональд Трамптың «Еуропа құлдырауда» және «әлсіз көшбасшылар басқарады» деген мәлімдемесін сынға алды. Ол Америка Құрама Штаттарын Еуропаның бірлігін бірге қорғауға шақырды, деп хабарлайды Ulysmedia.kz.
ЕУРОПА ДЕМОКРАТИЯСЫ ТУРАЛЫ
Фон дер Ляйеннің айтуынша, Трамп Еуропа демократиясына араласпауы тиіс.
«Сайлау туралы сөз болғанда, елдің көшбасшысын біз емес, сол елдің халқы таңдауы керек. Бұл – сайлаушылардың егеменді құқығы, оны қорғау қажет», – деді ол 11 желтоқсанда Брюссельде өткен Politico 28 шарасында.
Ол әрқашан Америка президенттерімен «өте жақсы жұмыс қарым-қатынаста» болғанын атап өтті. Сонымен бірге Еуропа өзін өзгелермен салыстырмай, өзіне назар аударуы тиіс екенін айтты.
БІРТҰТАС ЕУРОПАНЫ ҚОРҒАУҒА ШАҚЫРУ
«Мен жүрегіммен трансатлантикалық ынтымақтастықты қолдаймын. Бірақ ең маңыздысы – біз Еуропалық одақ екенімізді мақтан тұтамыз, өз күшті жақтарымызды көреміз және бар қиындықтарға төтеп бере аламыз», – деді ол Politico-ға берген сұхбатында.
Фон дер Ляйен Америка Құрама Штаттарын «біртұтас Еуропаны қорғауға» шақырды.
АҚШ СТРАТЕГИЯСЫНА ЖАУАП
Америка Құрама Штаттарының бірнеше күн бұрын жарияланған Ұлттық қауіпсіздік стратегиясында Еуропа алдағы 20 жылда «өркениеттік жойылуға» ұшырайды делінген. Бұған қатысты фон дер Ляйен «ешкім араласпауы тиіс» деп мәлімдеді. Ол Еуропа шетелдік араласуға, соның ішінде сайлауларға қарсы шаралар қабылдап жатқанын атап өтті.
