Теңіз кен орнынан газ тасымалдайтын магистральдық құбырлар салу жөніндегі келісімшарт қытайлық инвестор басқаратын консорциумға берілді, деп хабарлайды Ulysmedia.kz.
Теңізден тартылатын газ құбырлары
ҚазМұнайГаз компаниясы өзінің еншілес ұйымы KMG PetroChem Теңіз кен орнынан магистральдық құбырлар салу бойынша EPC-келісімшартқа қол қойғанын ресми түрде мәлімдеді. Мердігер ретінде екі қытайлық компаниядан (China Petroleum Pipeline Engineering және CITIC Construction), сондай-ақ «ЧППИ Қазақстан» ЖШС-нан құралған консорциум таңдалды. Консорциум жобаны әзірлеуге, жабдықтарды сатып алуға, негізгі жұмыстардың барлығын орындауға және нысанды пайдалануға беруге міндетті.
Атырау облысында салынатын бұл құбырлар арқылы Теңіз кен орнынан этан мен пропан тасымалданады. Әрбір құбырдың ұзындығы 210 шақырымды құрайды. Құрылыс жұмыстарын 2026 жылдың соңында бастау, ал нысандарды 2028 жылдың соңына дейін іске қосу жоспарланып отыр.
— Шикізат Теңізшевройл ЖШС-нан және Теңіз кен орнында салынып жатқан газ бөлу кешенінен жеткізіледі. Одан әрі өнім полиэтилен мен полипропилен өндіретін газ-химия кәсіпорындарына тасымалданады. Осылайша, магистральдық құбырлар технологиялық тізбектің негізгі буынына айналады, — деп мәлімдеді ҚМГ.
Қытайлық экспансия
Келісімшарт шарттарына сәйкес, мердігер жергілікті өндірушілер мен қосалқы мердігерлерді басымдықпен тартуы тиіс. Дегенмен мұнай-газ саласындағы кезекті ірі келісімшарттың тағы да қытайлық инвесторларға бұйырғанын атап өткен жөн. China Petroleum Pipeline Engineering — CNPC-ның еншілес кәсіпорны, ал CITIC Construction — қытайлық мемлекеттік қаржы корпорациясы CITIC Group құрамына кіреді.
Қытай компаниялары Қазақстанның мұнай-газ саласында кеңінен ұсынылған. Атап айтқанда, CNPC «СНПС-Ақтөбемұнайгаз» АҚ-ға иелік етеді, Шымкент мұнай өңдеу зауытын бақылайды, сондай-ақ Ақтөбе, Қызылорда, Маңғыстау және Ұлытау облыстарында мұнай өндіретін компанияларда үлестерге ие. Бұдан бөлек, жуырда Қазақстан алғаш рет Қытайдан авиациялық керосин сатып алды, ол қазақстандық мұнайдан өндірілген болуы мүмкін.
