Еуропалық комиссия Ресей Федерациясын қаржы жымқыру мен терроризмді қаржыландыру тұрғысынан жоғары тәуекелді елдер тізіміне енгізгеннен кейін, Қазақстан, Армения, Сербия, Тәжікстан, Оман және басқа мемлекеттердің банктері Ресеймен байланысты клиенттерге қатысты комплаенс-бақылауды күшейтті, деп хабарлайды Ulysmedia.kz.
ҚАРЖЫ ҰЙЫМДАРЫНЫҢ ТЕКСЕРІСІ
Украинаның Сыртқы барлау қызметінің дерегіне сүйенсек, қаржы ұйымдары қаражаттың қайдан келгенін және транзакцияның заңдылығын мұқият тексеріп, қосымша құжаттар талап етуде. Бұл талаптар заңды тұлғаларға да, жеке азаматтарға да қатысты. Егер қажетті дәлелдер ұсынылмаса, есепшоттар бұғатталады. Осылайша үшінші елдердің банктері ресейлік резиденттермен операцияларға күшейтілген шара қолдануға мәжбүр.
Ресми мақсат – қаржы жымқыруды, алаяқтықты және заң талаптарының бұзылуын болдырмау. Алайда нақты әсері әлдеқайда кең: ресейліктерге біртіндеп қаржылық оқшаулау режимі қалыптасып жатыр. Бұл процесс ресми санкциялардан тыс жүріп, тіпті санкцияға ресми түрде қосылмаған елдерде де ресейлік капиталмен кез келген байланыс барған сайын қауіпті тәуекел ретінде қабылдануда.
КОНТЕКСТ
23 қазан күні Еуропалық Одақ Ресейге қарсы 19-пакет санкцияны бекітті. Ол "көлеңкелі флот" деп аталатын мұнай танкерлеріне қарсы шараларды және сұйытылған табиғи газ импортына тыйымды қамтиды. Қара тізімге Қазақстандағы бір банк те енгізілді.
