Саясаттанушы Досым Сәтпаев Қазақстанда контент өндіру саласында қолмен басқару тетігі іске қосылғанын айтты, деп хабарлайды Ulysmedia.kz.
ТОЛЫҒЫРАҚ
Жуырда Қазақстанда Руың кім? фильмі прокаттан мерзімінен бұрын алынды, деп жазады Forbes. Бұған Мәжіліс депутаты Ерлан Саировтың аталған картинаны трайбализмді насихаттайды деп сынға алуы себеп болған. Бұл жағдай шығармашылық еркіндік пен цензураның шекарасы туралы кең қоғамдық талқылауға түрткі болды.
ПІКІР
Досым Сәтпаев бұл жағдайды Қазақстандағы қоғамдық кеңістіктерді реттеуге бағытталған жүйелі үрдістің бір көрінісі деп санайды. Оның пікірінше, билік бақылауды жоғалтып алу қаупін сезінгендіктен, қысымды күшейтіп отыр.
— Мұндағы логика айқын: цензура бір салада бекітілсе, ол міндетті түрде өзге бағыттарға да тарай бастайды. Әсіресе қоғамдық санаға ықпал ететін салалар осал келеді. Соңғы жылдары отандық кино, әсіресе қазақ тіліндегі туындылар көрермен арасында айтарлықтай танымал бола бастады, қоғамда үлкен қызығушылық тудырып отыр. Мемлекет осы сегментке бақылау әлсіреп бара жатқандай әсер алады да, әдеттегі қолмен басқару механизмін іске қосады, — дейді саясаттанушы.
