«Астық және майлы дақылдар. Қазақстан» ғылыми-зерттеу бюросы ауыл шаруашылығы министрлігімен бірлесіп 2024–2025 маусымдарына арналған Қазақстандағы пияз бен картоптың болжамды теңгерімдерін әзірледі, деп хабарлайды Ulysmedia.kz.
ПИЯЗ
Болжамға сәйкес, пияз экспорты 264 682 тоннадан 152 428 тоннаға, ал импорты 137 281 тоннадан 112 284 тоннаға дейін қысқарады. Сонымен қатар, өндіріс көлемі айтарлықтай өсіп, 756 744 тоннадан 1 062 600 тоннаға жетеді. Бұл егіс алқаптарының кеңеюі мен өнімділіктің артуымен байланысты.
Өндірістік тұтыну 127 512 тоннаға дейін ұлғаяды. Халықтың тұтынуы 629 344 тоннадан 1 022 456 тоннаға дейін өседі. Осылайша, жан басына шаққандағы пияз тұтыну 31 кг-нан 50 кг-ға дейін артқан.
КАРТОП
Картоп бойынша да өндіріс өсімі күтіледі: 2 634 610 тоннадан 2 939 000 тоннаға дейін. Бұл егіс алқаптарының ұлғаюы мен қолайлы ауа райы жағдайларымен байланысты.
Экспорт көлемі сәл төмендеп, 565 250 тоннадан 451 989 тоннаға қысқарады. Ал импорт, керісінше, 71 551 тоннадан 204 071 тоннаға дейін өседі. Жоғалтулар мен өндірістік тұтыну 646 580 тоннаға жетеді.
Халықтың картоп тұтынуы 2 140 911 тоннадан 2 691 082 тоннаға дейін артып, жан басына шаққандағы көрсеткіш 105 кг-нан 132 кг-ға дейін өседі. Бұл ішкі нарықта картоптың қолжетімділігі артқанын көрсетеді.
