Иранда желтоқсан айының соңынан бері жаппай наразылықтар басылмай тұр. Адамдар Тегеран мен басқа ірі қалалардың көшелеріне экономикалық жағдайдың күрт нашарлауына байланысты шығып жатыр, деп хабарлайды Ulysmedia.kz DW басылымына сілтеме жасап.
ТОЛЫҒЫРАҚ
Акциялар 28 желтоқсанда басталған. Оған бас қала мен Исфаханда жетекші университеттердің студенттері қосылған. Кей аудандарда полициямен қақтығыстар болған, құқық қорғаушылар көзді ашытатын газ қолданған. Уақыт өте келе наразылықтар тек экономикалық мәселе емес, саяси сипат та алған. Лозунгтарда билікке қарсы ұрандар мен өзгеріс талаптары айтылып жатыр.
Иран президенті Масуд Пезешкиан ішкі істер министріне акция қатысушыларымен диалог бастап, олардың талаптарын тыңдауды тапсырғанын мәлімдеді. Оның айтуынша, билік халықтың мәселесіне жауап беруі және дағдарыстан шығу жолын іздеуі керек.
КОНТЕКСТ
Наразылыққа экономикалық қиын жағдай себеп болды. Барлығы Тегеран базарынан басталған, саудагерлер инфляцияға және ұлттық валютаның күрт құлдырауына қарсы наразылық ретінде дүкендерін жауып қойған. Экономикалық дағдарыс әсіресе импорт тауарларын сатушыларға қатты әсер еткен. 29 желтоқсанда иран риалы жаңа антирекорд орнатып, еркін нарықта доллар үшін шамамен 1,4 миллионға дейін құлаған. Осы жағдайға байланысты елдің орталық банкінің басшысы отставкаға кетті.
