Ресей президенті Владимир Путин АҚШ президенті Дональд Трамп құрған Газа секторына арналған «Бейбітшілік кеңесіне» шақыру алды. Кремль бұл ұсынысты зерттеп жатқанын және барлық нюанстарды нақтылағысы келетінін мәлімдеді, деп хабарлайды Ulysmedia.kz.
ОРБАН ЖӘНЕ ТОҚАЕВ ШАҚЫРУДЫ ҚАБЫЛДАДЫ
18 қаңтарда Венгрия сыртқы істер министрі Петер Сийярто премьер-министр Виктор Орбанның шақыруды қабылдағанын хабарлады. 19 қаңтарда Қазақстан президенті Қасым-Жомарт Тоқаев та шақыруды «шынайы ризашылықпен» қабылдап, Таяу Шығыстағы бейбітшілікке, мемлекетаралық сенім мен жаһандық тұрақтылыққа үлес қосуға дайын екенін жеткізді.
БАСҚА ЕЛДЕРДІҢ ҚАТЫСУЫ
Bloomberg агенттігінің дерегіне сәйкес, Трамп Аргентина президенті Хавьер Милея мен Канада премьер-министрі Марк Карниді де кеңеске шақырды.
16 қаңтарда Германия сыртқы істер министрі Йоханн Вадефуль Берлиннің кеңес жұмысына қосылуға дайын екенін айтты. Ол ХАМАС ұйымы қатыспаған жағдайда ғана Газа секторында тұрақты болашақ болуы мүмкін екенін атап өтті.
The Telegraph басылымы Ұлыбритания, Германия, Франция, Италия, Сауд Арабиясы, Катар, Египет және Түркия да кеңес құрамында болуы ықтимал екенін жазды.
ГАЗА СЕКТОРЫНДАҒЫ ЖАҢА ӘКІМШІЛІК ЖӘНЕ ҚАРУЛЫ КҮШТЕР
«Бейбітшілік кеңесін» құру туралы хабар Палестинада 15 адамнан тұратын технократиялық әкімшілік жасақталғаннан кейін жарияланды.
14 қаңтарда АҚШ арнайы өкілі Уиткофф атысты тоқтатудың екінші кезеңіне көшкенін мәлімдеді. Бұл кезеңде ХАМАС-ты қарусыздандыру және халықаралық тұрақтандыру күштерін орналастыру көзделген. Оларға генерал-майор Джаспер Джефферс басшылық етеді.
ХАМАС ШАРТТЫ ТҮРДЕ ҚАРУДАН БАС ТАРТУҒА ДАЙЫН
2025 жылдың желтоқсанында ХАМАС Израиль әскері толық шыққан жағдайда қаруды мемлекет бақылауына беруге дайын екенін жариялады.
ҚАҚТЫҒЫСТЫҢ БАСТАЛУЫ ЖӘНЕ САЛДАРЫ
2023 жылдың 7 қазанында ХАМАС Израильге шабуыл жасап, 1200 адамды өлтірді және 250 бейбіт тұрғынды тұтқындады. Кейін кейбірі босатылды, кейбірі қаза тапты.
Израиль жауап ретінде ХАМАС-қа соғыс жариялады. Газа секторындағы әскери операциялар мен бомбалаулар салдарынан ХАМАС бақылауындағы дерек бойынша 70 мыңнан астам палестиндік қаза тапты, 169 мыңнан астамы жараланды.
