АҚШ президенті Дональд Трамп Швейцарияда Украина президенті Владимир Зеленскиймен кездесетінін мәлімдеді. Оның айтуынша, қазіргі таңда Украина мен Ресей басшылары соғысты тоқтату жөнінде келісімге келуге мүмкіндік бар кезеңге жеткен, деп хабарлайды Ulysmedia.kz.
ТОЛЫҒЫРАҚ
Трамптың сөзінше, ол Ресей президенті Владимир Путинмен келіссөз жүргізіп жатыр. АҚШ президенті Путин соғысты аяқтау үшін мәміле жасауға дайын екенін айтты. Сонымен қатар, Трамп Владимир Зеленский де келісімге келуге әзір деп санайтынын жеткізді.
Reuters агенттігінің жазуынша, Трамп Зеленскиймен сәрсенбі күні кездесетінін екі рет айтқанымен, кейінірек кездесудің бейсенбіге жоспарланғанын нақтылаған.
АҚШ президенті соғысты тоқтату жөніндегі келісімге ертерек қол жеткіземін деп үміттенгенін, алайда екі көшбасшының арасында «өшпенділік» бар екенін атап өтті. Оның айтуынша, Вашингтон қазір атысты тоқтату жөніндегі келісімге делдал болуға жақындап қалған.
— Меніңше, біз бұл мәселеде жеткілікті деңгейде жақындадық. Мұны тоқтатуымыз керек… Қазір олар бір үстел басына отырып, келісім жасауға болатын кезеңде тұр деп ойлаймын. Ал егер олай етпесе — онда олар ақымақ, — деді Трамп.
Сонымен қатар, ол журналистерге Владимир Путиннің оның бастамасымен құрылған, жаһандық қақтығыстарды реттеуге бағытталған «Бейбітшілік кеңесі» бастамасына қосылу туралы шақыруды қабылдағанын айтты. Алайда Ресей президенті Мәскеу бұл ұсынысты әлі де зерделеп жатқанын және белгіленген тәртіппен жауап беретінін мәлімдеген.
Ресей ақпарат агенттіктері таратқан мәліметке сәйкес, Владимир Путин Ресей Қауіпсіздік кеңесінің отырысында бұл кеңес негізінен Таяу Шығыстағы бейбіт процесті реттеуге бағытталған деп есептейтінін айтты. Оның сөзінше, Ресей кеңес жұмысына ұзақмерзімді мүшелік аясында Трамп ұсынғандай, мұздатылған ресейлік активтер есебінен 1 миллиард доллар бөлуге дайын.
Алайда бұл бастама Украина тарапынан қарсылыққа ұшырауы мүмкін. Киев билігі мұздатылған ресейлік активтер елді қалпына келтіру үшін қажет екенін бірнеше рет мәлімдеген.
