ҚР Ұлттық банк төраға орынбасары Әлия Молдабекова қазақстандық балаларға «Ұлттық қор – балаларға» жобасы бойынша өткен жылдың төлемдері қашан түсетінін жариялады, деп хабарлайды Ulysmedia.kz.
ТӨЛЕМ ҚАШАН ЖҮРГІЗІЛЕДІ
Әлия Молдабекованың айтуынша, биылғы жылы 1 ақпан демалыс күніне сәйкес келгендіктен, қаражатты аудару 30 қаңтарға, жұма күніне жоспарланған. Алайда азаматтар ақшаны шоттарынан 31 қаңтар күні түстен кейін немесе 1 ақпан таңертең көреді.
ӘР БАЛАҒА ТӨЛЕНЕТІН СОММА
Төлем мөлшері алдын ала белгіленген: әр балаға 130 АҚШ доллары (қазіргі бағам бойынша 65 мың теңгеден астам).
«Сома белгілі – шамамен 130 доллар әр баланың шотына түседі», – деді ол.
БАҒДАРЛАМАНЫҢ ҮШ ЖЫЛДЫҚ НӘТИЖЕСІ
Бұл жыл – бағдарламаның үшінші жылы. Алғашқы жылы балаларға шамамен 100 доллар, екінші жылы – 130 долларға жуық төленген. Алдағы төлемді қоса есептегенде жалпы көлемі 360 доллардан (181 мың теңгеден астам) асады. Инвестициялық табысты ескергенде бұл көрсеткіш сәл өседі.
ИНВЕСТИЦИЯЛЫҚ ТАБЫС
«Біз әрқашан айтқанбыз: балалар кәмелетке толғанға дейін бұл ақша бос жатпайды, ол инвестицияланады. Сондықтан үш жыл бойы бағдарламаға қатысқан балалардың шотында шамамен 370 доллар жиналады», – деп түйіндеді Молдабекова.
ЖАҢА ҰСЫНЫС
Бұған дейін Ұлттық банк аға балаларға төлемді кіші бауырларына аударуға рұқсат беру мүмкіндігін қарастырған еді.
