АҚШ Сенатында демократтар мен республикашылдар федералдық мекемелердің қаржыландыруын тоқтатуға жол бермеу үшін келісімге келді. Бұл компромисс ұзаққа созылатын шатдаунның алдын алуды көздейді, деп хабарлайды Ulysmedia.kz.
КЕЛІСІМНІҢ МӘНІ
Ақпарат көздерінің мәліметінше, демократтар көпшілік мемлекеттік мекемелердің бюджетін қолдауға дайын. Бірақ олар иммиграциялық қызметтердің өкілеттігін шектеу шараларын енгізуді талап етті.
ІШКІ ҚАУІПСІЗДІК МИНИСТРЛІГІНЕ ҚАТЫСТЫ ШЕШІМ
CBS телеарнасының хабарлауынша, АҚШ Ішкі қауіпсіздік министрлігі (Department of Homeland Security – DHS) және оған бағынысты құрылымдар, соның ішінде Иммиграция және кедендік бақылау қызметі (Immigration and Customs Enforcement – ICE), әзірге тек екі аптаға қаржыландырылатын болды. Осы уақыт ішінде тараптар жаңа бюджет пен қызметкерлердің әрекеттеріне қатысты қатаң шектеулерді келісіп алуды жоспарлап отыр.
ТРАМПТЫҢ МӘЛІМДЕМЕСІ
АҚШ президенті Дональд Трамп Truth Social желісінде жазды.
«Республикашылдар мен демократтар Конгресте бірігіп, үкіметтің басым бөлігін қыркүйекке дейін қаржыландыруға келісті. Сонымен қатар Ішкі қауіпсіздік министрлігінің өкілеттігі ұзартылды. Бұған аса маңызды Берег күзеті де кіреді, біз оны бұрын-соңды болмаған деңгейде кеңейтіп, қайта ұйымдастырып жатырмыз. Бұл бастамаға екі партия да қолдау көрсетеді деп үміттенемін», – деп жазды.
ҚАРЖЫЛАНДЫРУДЫҢ МЕРЗІМІ
Қорғаныс министрлігі, Денсаулық сақтау министрлігі, Қаржы министрлігі, федералдық сот жүйесі және басқа да мекемелердің қаржыландыруы ағымдағы қаржы жылының соңына дейін, яғни 30 қыркүйекке дейін ұзартылды.
ДЕМОКРАТТАРДЫҢ ТАЛАБЫ
Бұған дейін демократтар Ішкі қауіпсіздік министрлігін қаржыландыруды 1,2 триллион АҚШ долларын құрайтын федералдық бюджеттен алып тастауды талап еткен. Себебі Миннеаполисте иммиграциялық агент соңғы аптада екінші рет АҚШ азаматын атып өлтірген болатын.
ШУМЕРДІҢ МӘЛІМДЕМЕСІ
Сенаттағы демократтар көшбасшысы Чак Шумер бейсенбі күні Ақ үй бұл талаппен келісетінін мәлімдеді. Екі партияның жетекшілері келісімді жұма күні дауысқа шығаруға үміттеніп отыр.
DHS-ҚА БАҒЫНЫСТЫ ҚҰРЫЛЫМДАР
Ішкі қауіпсіздік министрлігіне ICE, Кеден және шекара қызметі (Customs and Border Protection – CBP), Берег күзеті және Құпия қызмет сияқты күштік құрылымдар бағынышты.
ҚАРУЛЫ ҚЫЗМЕТКЕРЛЕРДІҢ ӘРЕКЕТІ
2026 жылдың 7 қаңтарында Миннеаполисте ICE агенті 37 жастағы Рене Гудты атып өлтірді. Ал 24 қаңтарда сол қалада шекара қызметінің қызметкері 37 жастағы Алекс Преттиді атып тастады. Бұл оқиғалар мен Миннесота штатында жүргізілген заңсыз иммиграцияға қарсы операция бүкіл елде наразылық тудырды.
