Қазақстанның Қорғаныс министрлігі Ресей әскери күштерімен бірге өңірлік әуе шабуылына қарсы қорғаныстың бірыңғай жүйесі аясында бірлескен оқу-жаттығу өткізіп жатқанын мәлімдеді, деп хабарлайды Ulysmedia.kz.
МӘН-ЖАЙ
Ведомствоның дерегінше, жаттығу 2026 жылғы 20 ақпан мен 10 наурыз аралығында өтеді. Бұл — екі ел арасындағы өзара іс-қимыл кестесіне алдын ала енгізілген жоспарлы іс-шара.
Оқу барысында әскери қызметшілер әуе нысандарын анықтау және оларды ілесіп отыру, әуе кеңістігін бұзған ұшақтарды тосқауылдау, сондай-ақ оларды белгіленген әуеайлақтарға қондыруға мәжбүрлеу әрекеттерін пысықтайды, яғни кезекші ӘҚҚ күштерінің дайындығы мен тараптар арасындағы үйлестіру деңгейі тексеріледі.
Қорғаныс министрлігі жаттығудың штаттық екенін және жауынгерлік әзірлікті арттыру мен өзара іс-қимылды жетілдіруге бағытталғанын атап өтті.
– Азаматтар мен бұқаралық ақпарат құралдары өкілдерінен тек ресми ақпарат көздеріне сеніп, расталмаған мәліметтерді таратпауды сұраймыз, – делінген хабарламада.
БҰҒАН ДЕЙІН
20 ақпан күні таңертең Ресейдің жойғыш ұшағы Атырауға шұғыл қонған болатын.
