Қаскелең қаласындағы қоғамдық моншада жанжал шығып, соның салдарынан жасөспірім зардап шекті. 13 жастағы баланың анасы ұлын монша қызметкері ұрып-соққанын айтты, деп хабарлайды Ulysmedia.kz.
МӘН-ЖАЙ
Әйелдің айтуынша, оқиға 9 наурыз күні кешке болған. Жасөспірім моншаға досымен бірге барған. Балалар бір сэндвичті екеуіне сатып алмақ болған кезде, қызметкер, ананың сөзінше, өзіне және әріптестеріне арнап бірден төрт сэндвич сатып алуды талап еткен.
Әйелдің айтуынша, ұлы әзілдеп жауап беріп, тағы не істеу керегін сұраған. Осыдан кейін ер адам ашуланып, жасөспірімді ұра бастаған.
Оқиғаның видеосын анасы әлеуметтік желіде жариялаған. Кадрлардан ересек ер адамның баланы ұрып-соғып жатқанын көруге болады.
Әйелдің сөзінше, бастапқыда учаскелік полицей ер адамның әрекетін ұсақ бұзақылық деп бағалаған. Алайда ол бұл жағдай әлдеқайда ауыр бап бойынша тергелуге тиіс деп есептейді.
ПОЛИЦИЯ НЕ ДЕЙДІ
Алматы облысы полиция департаменті бұл оқиға бойынша сотқа дейінгі тергеу басталғанын хабарлады.
Қазіргі уақытта іс ҚР Қылмыстық кодексінің 109-1-бабы (ұрып-соғу) бойынша қарастырылып жатыр.
