Мәжіліс депутаты Ерлан Саиров Атырау облысы әкімінің бұрынғы орынбасары Бақытгүл Хаменованың жазасының өзгеруіне қатысты пікір білдірді, деп хабарлайды Ulysmedia.kz.
ТОЛЫҒЫРАҚ
Депутаттың айтуынша, Хаменова жазадан босатылмаған.
- Бақытгүл Хаменова жазадан босатылған жоқ. Тек жазаның формасы өзгерді. Өздеріңізге белгілі, ол кісінің жас балалары бар. Сондықтан бұл соттың жеке ісі. Заң бойынша сот өзінің ішкі дүниетанымы бойынша және Қазақстанның заңдарына жүгініп шешім қабылдайды. Бұл соттың жеке шешімі, – деді Ерлан Саиров.
Қандай негізде шешім қабылданды?
16 наурыз күні Атырау қаласының №2 соты пробация қызметінің ұсынысын қарады. Үш жылдық жазаны өтеуді кейінге қалдыру мерзімі (баласының кішкентай болуына байланысты берілген) аяқталғанға дейін, яғни 2026 жылғы 10 наурызға дейін Хаменова заң бұзбаған және әкімшілік жауапкершілікке тартылмаған.
Осыны ескерген сот қалған жаза мерзімін бостандығын шектеумен алмастырып, пробациялық бақылау белгіледі.
Не үшін сотталған еді?
Бақытгүл Хаменоваға қатысты үкім 2022 жылдың қараша айында шыққан. Ол пара алу ісі бойынша кінәлі деп танылған. Іс 4,5 млн теңге көлеміндегі қаражатқа байланысты болған. Бұл қаржы Абай Құнанбайұлына ескерткіш орнату жобасымен байланысты делінген.
Сол кезде сот оны 7 жылға бас бостандығынан айыруға, мүлкін тәркілеуге және өмір бойы мемлекеттік қызметте жұмыс істеу құқығынан айыруға үкім шығарған. Алайда кішкентай балаларына байланысты жаза өтеу үш жылға кейінге қалдырылған еді.
Хаменова өз кінәсін мойындамай, үкімге шағым түсіргенімен, сот шешімі өзгеріссіз қалған.
