Қытайға қарсы наразылыққа шыққан 19 адам сотталды

ҮКІМ

Азаттық радиосының жазуынша, сот үкімімен 11 адам 5 жылға бас бостандығынан айырылған. Қалғандары 4 жыл 8 айдан, 5 жылға дейін бас бостандығын шектеу жазасына кесілген. Айыпталушылар мен олардың жақындары үкіммен келіспей, сот ғимараты алдында наразылық білдірді. 

Сотталғандар:

• Бекзат Мақсұтхан, "Атажұрт" ұйымының жетекшісі – 5 жыл түрме жазасы.
• Нәзигүл Мақсұтхан, Бекзат Мақсұтханның қарындасы әрі "Атажұрт" қозғалысының заңгері – 4 жыл 8 ай бас бостандығын шектеу.
• Гүлдария Шеризат, "Атажұрт" белсендісі – 5 жыл түрме жазасы. Кәмелет жасына толмаған баласы болғандықтан жазасы кейінге шегерілді.
• Гүлнәр Шаймұрат, "Атажұрт" белсендісі – 5 жыл түрме жазасы. Кәмелет жасына толмаған баласы болғандықтан жазасы кейінге шегерілді.
• Тұрсынбек Қаби, "Атажұрт" белсендісі – 5 жыл түрме жазасы.
• Еркінбек Нұрақын, "Атажұрт" белсендісі – 5 жыл түрме жазасы.
• Ербол Нұрлыбаев, "Атажұрт" белсендісі – 5 жыл түрме жазасы.
• Марғұлан Нұрданғазы, "Атажұрттың" жақтасы – 5 жыл түрме жазасы.
• Қуандық Қосжанов, "Атажұрттың" жақтасы – 5 жыл түрме жазасы.
• Бақытжан Шұғыл, "Атажұрттың" жақтасы – 5 жыл түрме жазасы.
• Батылбек Байқазы – 5 жыл түрме жазасы.
• Ерғали Нұрлыбаев, "Атажұрттың" жақтасы – 5 жыл түрме жазасы.
• Қанат Тұрдыбай, "Атажұрттың" жақтасы – 5 жылға бас бостандығын шектелді.
• Асылхан Қолхаев, "Атажұрттың" жақтасы – 5 жылға бас бостандығын шектелді.
• Аян Қалымбек, "Атажұрттың" жақтасы – 5 жыл бас бостандығын шектеу.
• Бақытнұр Нұрмұқан - 5 жыл бас бостандығын шектеу (қамаудан босатылады).
• Беделхан Қабыләшім – 4 жыл 8 ай бас бостандығын шектеу.
• Нұркелді Нұрсапа, "Атажұрттың" жақтасы – 4 жыл 8 ай бас бостандығын шектеу.
• Ақжігіт Бейсенәлі – 4 жыл 8 ай бас бостандығын шектеу (қамаудан босатылады).

КОНТЕКСТ

Тіркелмеген «Атажұрт» ұйымының 19 белсендісінің үстінен «Ұлтаралық араздық қоздыру» бабы бойынша айып тағылған. Істің қозғалуына белсенділердің былтыр 13 қарашада Алматы облысы Ұйғыр ауданы Қалжат ауылы маңында өткізген наразылық акциясы себеп болған.

Сол уақытта олар  Қытай туы мен Қытай төрағасы Си Цзиньпиннің суретін ұстап шығып, Шыңжаңда түрлі желеумен ұсталып,  «түзету лагеріне» қамалған қазақтарды босатуды және екі ел арасындағы визасыз режимді жоюды талап еткен болатын.

Акция барысында Қытайға жұмыс істеуге кетіп, кейін сол жақта ұсталған Қазақстан азаматы Әлімнұр Тұрғанбайды елге қайтаруды Қытайдан талап еткен. Жақында оның қызы Ұлжалғас Әлімнұр әкесінің Қытайда 2,5 жылға сотталғанын айтқан.

48 жастағы Әлімнұр Тұрғанбай Қазақстанға отбасымен бірге 2016 жылы көшіп келген. Отбасында үш қызы бар. Өзі де, балалары мен әйелі де 2017 жылдан бері Қазақстан азаматы.

Қазақстанның сыртқы істер министрлігі Қытай берген ақпаратқа сүйеніп қайтарған жауабында, Әлімнұр Тұрғанбайдың Қытай азаматтығынан шықпағаны, ал қос азаматтық екі елде де «заңсыз» екені туралы айтылған.