2026 жылдың бірінші тоқсанында Шанхайдан 400 мыңнан астам электромобиль экспортталды, деп хабарлайды ulysmedia.kz Синьхуа агенттігіне сілтеме жасап.
Бұл халықаралық нарыққа шығарылған автомобильдердің жалпы көлемінің шамамен 70 пайызын құрайды, деп хабарлайды жергілікті кеден қызметі.
Шанхай — Қытайдағы автомобиль экспорттайтын ең ірі портты қала. Қазіргі таңда көліктер мегаполистен шетелдік нарыққа Пудун жаңа ауданындағы Вайгаоцяо порт аймағы және Линьган жаңа ауданындағы Наньган айлағы арқылы жөнелтіледі.
Кеден деректеріне сәйкес, биылғы жылдың бірінші тоқсанында Вайгаоцяо порт аймағы арқылы 386 мың автокөлік экспортталған, бұл өткен жылмен салыстырғанда 15,9 пайызға көп. Оның ішінде ЖЭК(жаңа энергия көздері) көліктерінің үлесі 68,5 пайызды құрады.
Ал Линьган жаңа ауданындағы Наньган айлағы арқылы автомобиль экспорты жылдық есепте 111 пайызға өсіп, 207 мың данаға жеткен. Осы аймақтан экспортталған ЖЭК көліктерінің саны бір жылда 176 пайызға артқан.
Бұл қаңтар-наурыз айлары аралығында Шанхай шекаралық өткелдері арқылы күн сайын орта есеппен шамамен 6600 автокөлік, оның ішінде 4500-ге жуығы ЖЭК көліктері экспортталғанын білдіреді. Бұл көліктер Бельгия, Бразилия және Оңтүстік Африка Республикасы сияқты бірқатар елдерге жеткізіледі.
Кедендік рәсімдеуге сұраныстың қарқынды өсуіне байланысты Шанхайда “жасыл дәліздер” ашылып, тәулік бойы алдын ала жазылу арқылы қызмет көрсету жолға қойылған. Сонымен қатар, жергілікті кеден қызметкерлері тексеру процестерін оңтайландыру үшін үлкен деректерді талдау және тәуекелдерді бағалау технологияларын қолдануда.
