Дүйсенбі күні мұнай бағасы қайта қымбаттады. Бұған АҚШ пен Израильдің Иранға қарсы соғысын тоқтатуға бағытталған әрекеттердің тұйыққа тірелуі әсер еткен, деп хабарлайды Ulysmedia.kz.
БАҒАНЫҢ ҚҰБЫЛУЫ
Reuters агенттігінің жазуынша, нарықтағы алаңдаушылықты Біріккен Араб Әмірліктеріндегі атом электр станциясына жасалған шабуыл және АҚШ президенті Дональд Трамптың Иранға қарсы ықтимал әскери қимылдарды талқылауы мүмкін деген ақпарат күшейтті.
Brent маркалы мұнай фьючерстері 2,03 долларға немесе 1,86 пайызға өсіп, баррелі 111,29 долларға жетті. Сауда барысында баға 112 долларға дейін көтеріліп, 5 мамырдан бергі ең жоғары деңгейге шықты.
АҚШ-тың WTI маркалы мұнайы да 2,31 долларға немесе 2,19 пайызға қымбаттап, баррелі 107,73 доллар болды. Күн ішінде баға 108,70 долларға дейін жетіп, 30 сәуірден бергі рекордты жаңартты. Маусым айына арналған келісімшарттың мерзімі сейсенбіде аяқталады.
Өткен аптада екі эталон да жеті пайыздан астам өсім көрсеткен. Бұған Ормуз бұғазы маңындағы кемелерге шабуыл мен оларды басып алу әрекеттерін тоқтатуы мүмкін бейбіт келісімге деген үміттің әлсіреуі себеп болған. Сонымен қатар, Трамп пен Қытай төрағасы Си Цзиньпин арасындағы келіссөздер де нәтиже бермеді. Әлемдегі ең ірі мұнай импорттаушы ел саналатын Қытай қақтығысты реттеуге араласуға дайын екеніне ишара жасамаған.
Prestige Economics сарапшысы Джейсон Шенкердің айтуынша, Иран төңірегіндегі қақтығыс созылған сайын мұнай бағасының ұзақ уақыт жоғары болып қалу қаупі артады.
«Бұл пайыздық мөлшерлемелердің де ұзақ уақыт жоғары деңгейде сақталуына әкелуі мүмкін. Соның салдарынан жаһандық экономикалық өсім баяулауы ықтимал», – деді ол.
БАӘ МЕН САУД АРАБИЯСЫНА ШАБУЫЛ
БАӘ мен Сауд Арабиясына жасалған дрон шабуылдары, сондай-ақ АҚШ пен Иранның қатаң мәлімдемелері жағдайдың одан әрі ушығуы мүмкін деген қауіпті күшейтті.
БАӘ билігі Барака атом электр станциясына жасалған шабуылдың қайдан ұйымдастырылғанын тексеріп жатқанын мәлімдеді. Сонымен бірге мұндай «террористік әрекеттерге» жауап беру құқығын өзінде қалдыратынын айтты.
Ал Сауд Арабиясы Ирак жағынан әуе кеңістігіне кірген үш дронды атып түсіргенін хабарлап, елдің қауіпсіздігі мен егемендігін қорғау үшін барлық қажетті шара қабылданатынын ескертті.
IG сарапшысы Тони Сикамордың пікірінше, бұл шабуылдар АҚШ немесе Израиль Иранға қарсы соққыны қайта бастаса, Иран немесе оған жақтас топтар Парсы шығанағындағы энергетикалық нысандар мен маңызды инфрақұрылымға шабуылды күшейтуі мүмкін екенін аңғартады.
Axios мәліметінше, сейсенбі күні Дональд Трамп ұлттық қауіпсіздік мәселесіне жауапты негізгі кеңесшілерімен кездесіп, Иранға қатысты ықтимал әскери сценарийлерді талқыламақ.
Сондай-ақ сенбі күні Трамп әкімшілігі Үндістан секілді елдерге Ресей мұнайын теңіз арқылы сатып алуға мүмкіндік беріп келген санкциялық жеңілдікті тоқтатуы мүмкін екенін мәлімдеді. Бұған дейін бұл режим бір айға ұзартылған еді.
