Қазақстанның Венадағы елшілігі алдында шешен диаспорасының өкілдері митинг өткізді. Олар Қазақстан билігінен шешен белсендісі Мансур Мовлаевты Ресейге экстрадицияламауды сұрады, деп хабарлайды Ulysmedia.
ТОЛЫҒЫРАҚ
Кавказ.Реалий басылымының жазуынша, Вена қаласында шешен диаспорасының өкілдері Қазақстанда қамауда отырған шешен белсендісі Мансур Мовлаевты Ресейге экстрадициялауға қарсы митинг өткізген. Митингке қатысушылар белсендіге қорғану құқығын қамтамасыз етуді талап еткен.
Құқық қорғаушы Роза Дунаевның сөзінше, егер Мовлаев Ресейге экстрадицияланған жағдайда ол бас бостандығынан айырылып, түрмеде азаптауға ұшырауы мүмкін.
КОНТЕКСТ
8 мамырда Алматы соты Мансур Мовлаевтың экстрадициялық қамау мерзімін 13 шілдеге дейін ұзартқан.
Мансур Мовлаев — Шешенстан басшысы Рамзан Қадыровты сынаған белсенді. Ол Ресейге қайтарылса, қудалау мен азаптауға ұшырайтынын айтып, Қазақстаннан пана сұраған.
Қазақстанның Бас прокуратурасы биыл қаңтарда оны Ресейге экстрадициялау туралы шешім қабылдаған. Бірақ кейін БҰҰ Адам құқықтары жөніндегі комитеті істі қарау аяқталғанша экстрадицияны тоқтата тұруды ұсынған.
Құқық қорғаушылар Қазақстан билігін Мовлаевты Ресейге бермеуге және халықаралық міндеттемелерді сақтауға шақырып отыр.
