Қатардың бұрынғы әмірі, елдің шағын бедуин мемлекетінен аймақтағы ең ықпалды ойыншылардың біріне айналуына зор үлес қосқан шейх Хамад бен Халифа Әл Тани 74 жасында қайтыс болды. Бұл туралы Қатар әмірінің әкімшілігі мәлімдеді, деп жазады Ulysmedia.kz.
Мән-жай
Шейх Хамад Қатарды 1995 жылдан 2013 жылға дейін басқарды. Кейін билікті өз еркімен ұлы, қазіргі әмір шейх Тамим бен Хамад Әл Таниге тапсырды.
«Әкімшілік Жоғары мәртебелі Әке-әмір шейх Хамад бен Халифа Әл Танидің қайтыс болғанын қайғымен хабарлайды. Алла оның жанын рақымына бөлеп, елі мен халқы үшін жасаған еңбегінің сауабын берсін», - делінген ресми мәлімдемеде.
Билік құрған жылдары шейх Хамад Қатардың халықаралық беделін айтарлықтай күшейтті. Оның тұсында Al Jazeera телеарнасы құрылып, әлемге танылды. Сондай-ақ, Қатар 2022 жылғы футболдан әлем чемпионатын өткізу құқығына ие болды.
Халқы 2,5 миллионнан сәл асатынына қарамастан, Қатар бүгінде сұйытылған табиғи газдың әлемдегі ең ірі экспорттаушысы, жаһандық деңгейдегі ірі инвесторлардың бірі және Таяу Шығыс дипломатиясындағы маңызды елдердің бірі саналады.
2013 жылғы маусымда шейх Хамад билікті бейбіт түрде тапсыру үшін тағынан өз еркімен бас тартып, оны ұлына берді. Бұл Парсы шығанағындағы мұрагерлік монархиялар арасында тақтың ерікті түрде берілуінің сирек мысалы болды.
Шейх Хамадтың өзі билікке 1995 жылы әкесін қан төгілмеген төңкеріс нәтижесінде тақтан тайдырғаннан кейін келген.
