Қырғызстанда хиджабты ұлттық киімнің бір бөлігі ретінде тану ұсынылуы мүмкін. «7 арнаның» Жогорку Кенештегі дереккөздеріне сүйеніп хабарлауынша, депутаттар бұл мәселені жазғы демалыстан кейін, парламент жұмысы қайта басталған соң талқылауды жоспарлап отыр, деп жазады Ulysmedia.kz.
Бастамаға не түрткі болды?
Дереккөздердің мәліметінше, ұсыныс қырғыз мәдениетінде әйелдердің ертеден бас киім мен орамал таққан дәстүріне байланысты көтеріліп отыр. Мұндай киім үлгілері сырттай хиджабқа ұқсайды.
Тақырып бұрыннан талқыланып келеді
Қырғызстанда діни киімге қатысты пікірталас бірнеше жылдан бері жалғасып келеді. Бұған дейін парламентте мемлекеттік мекемелер мен оқу орындарындағы киім үлгісі, сондай-ақ, ұлттық дәстүрді сақтау мәселесі бірнеше рет сөз болған.
Әзірге Жогорку Кенештің тиісті комитеттері мен Қырғызстан мұсылмандары діни басқармасы бұл бастамаға ресми пікір білдірген жоқ.
Қазіргі талап қандай?
2025 жылғы 1 ақпаннан бастап Қырғызстанда адамның жүзін толық жауып, жеке басын анықтауға кедергі келтіретін киімді қоғамдық орындарда киюге тыйым салынған. Бұл шектеу никабқа қатысты.
Талапты бұзғандарға 20 мың сом айыппұл салынады. Ал хиджаб бұл тыйымға кірмейді, өйткені ол адамның жүзін жаппайды.
Қырғызстан мұсылмандарының Ғұламалар кеңесі де осы ережені қолдап, хиджаб адамның жеке басын тануға кедергі келтірмейтінін түсіндірген. Кеңес өкілдері сақал қоятын ер адамдар да оны таза ұстап, ұқыпты жүруі керек екенін айтқан.
