Қазақстанның бір қаласында көлік тамақ жеткізу қызметінің курьерін қағып кеткен. Соған қарамастан, жарақат алған жігіт тағамды тұтынушыға апарып, тапсырысын орындаған, деп хабарлайды Ulysmedia.kz.
Оқиға туралы әлеуметтік желі қолданушыларының бірі жазды. Оның айтуынша, мекенжайға келген курьердің үсті-басы қанға боялған, киімі жыртылған, тістері сынған.
Курьердің айтуынша, ол тапсырысты апара жатқанда жол апатына түскен. Көлік қаққаннан кейін ол ауруханаға барудың орнына, алдымен тапсырысты жеткізуді жөн көрген.
Желі қолданушылары курьерге көмек сұрады
Жігіттің әрекеті көпшілікті бейжай қалдырмады. Әлеуметтік желі қолданушылары «Яндекс Go» компаниясын оқиғаға назар аударып, зардап шеккен курьерге қолдау көрсетуге шақырды.
Көпшілік курьерлердің күн сайын қиын жағдайда еңбек ететінін, ұзақ уақыт көшеде жүріп, нәпақа табу үшін денсаулығын қатерге тігетінін жазды.
Кейбір азаматтар зардап шеккен жігіттің еміне және сынған тістерін қалпына келтіруге қаражат жинауды ұсынды.
Жүргізушілерге ескерту жасалды
Пікір жазғандар көлік жүргізушілерінен курьерлерге құрметпен қарауды сұрады. Олар адал еңбегімен күн көріп жүрген жандардың қауіпсіздігіне бейжай қарамауға шақырды.
Әзірге оқиғаның нақты қай қалада және қашан болғаны белгісіз. Полиция мен компания бұл жағдайға қатысты ресми пікір білдірген жоқ.
