Мемлекет басшысы Армения премьер-министрімен телефон арқылы сөйлесті, деп хабарлайды Ulysmedia.kz.
Толығырақ
Қасым-Жомарт Тоқаев Никол Пашинянды Армения Премьер-министрі лауазымына қайта тағайындалуымен құттықтап, армян халқының игілігі жолындағы мемлекеттік қызметіне табыс тіледі.
Никол Пашинян жылы лебізге ризашылығын білдіріп, Қазақстан Президенті мен халқына Құрылтай сайлауын сәтті өткізуге тілектестігін жеткізді. Президент пен Премьер-министр қазақ-армян қарым-қатынасы қарқынды түрде дамып келе жатқанына көңіл толатынын атап өтіп, екі ел арасындағы сан қырлы ынтымақтастықты тереңдетуге дайын екендерін растады.
Сонымен қатар бұған дейін, соның ішінде былтыр қараша айында Армения Үкіметі басшысының Астанаға жасаған ресми сапары кезінде қол жеткізілген уағдаластықтарды іске асыру барысы талқыланды.
Сауда-экономикалық, көлік-логистикалық және мәдени-гуманитарлық салалардағы ықпалдастықты кеңейтуге баса назар аударылды.
Контекст
Еске салайық, бұған дейін Никол Пашинян бүкіл үкімет құрамымен бірге отставкаға кеткен еді. Бұл - жаңа парламент жұмысын бастағаннан кейін Конституцияға сәйкес жүргізілетін міндетті рәсім.
Одан кейін биліктегі «Азаматтық келісім» партиясы Пашинянды премьер-министр қызметіне қайта ұсынды. Президент оның кандидатурасын бекітті.
