Мемлекет басшысы Қасым-Жомарт Тоқаев қазақстандықтарды амандасудың байыпты, дәстүрге жақын үлгісіне оралуға шақырды. Оның айтуынша, ер адамдар қол алысып амандасқаны жөн, ал құшақтасып, беттен сүюдің орнына қолды жүрек тұсына қоюға болады, деп хабарлайды Ulysmedia.kz.
Мән-жай
Бұл туралы Президент 23 тамызда өткен брифингте жүріс-тұрыс мәдениеті мен қоғамдық әдепке қатысты сауалға жауап беру кезінде айтты.
Тоқаев жаңа мінез-құлық әдебін қалыптастыру жөніндегі бастаманы өзі көтергенін жеткізді. Оның айтуынша, мұндай ойға әр буын өкілдерінің бүгінгі қарым-қатынасын бақылап жүріп келген.
– Ер адамдардың бір-бірін құшақтап, сүйіп амандасуы, сәлемдесу барысында әйелдердің еркектерді, еркектердің әйелдерді бетінен сүюі дұрыс емес. Біздің салт-дәстүрімізде мұндай ешқашан болмаған, – деді Президент.
Ол әскери адамдардың амандасу әдебіне де жеке тоқталды.
– Кеңес Одағы маршалының, Дүниежүзілік соғыста, Ұлы Отан соғысында жеңіске жеткен маршалдардың осындай қылық көрсеткенін елестете аласыздар ма? Еркектер қолының ұшын ұстата салмай, қолды қаттырақ қысып амандасуы керек. Сәл жымиса ғана жеткілікті. Әрқашан солай болған. Тіпті, осы адамды көргеніңізге шын мәнінде қуанышты болсаңыз, оң қолыңызды кеудеңізге қойып амандасыңыз. Өмірде мұндай жайт жиі кездеседі. Сондықтан мен жаңа жүріс-тұрыс әдебі туралы мәселе көтердім, – деді Тоқаев.
Президент бұл мәселенің тек амандасу үлгісімен шектелмейтінін атап өтті. Оның айтуынша, жаңа қоғамдық әдеп өзгеге құрметпен қарауды, тәртіпті, тазалықты және жауапкершілікті де қамтуы керек.
«Мәдениетті ұлтқа айналуымыз керек»
Тоқаев жаңа қоғамдық әдепті тазалық мәдениетімен де байланыстырды.
– Қазір Астанада, басқа қалаларда, аудандар мен облыстық маңызы бар шаһарларда оң өзгерістерге куә болып жүрсіздер. Біз өңір басшыларына жоғары талап қойдық. Осы іспен түпкілікті айналысамыз. Өйткені тазалық дегенді тура мағынасында ғана емес, ой-сананың, жан дүниенің тазалығы деп түсінген жөн. Белгілі тұлғалардың бірі айтқандай, ой тазалығы бой тазалығымен де ұштасқаны жөн. Яғни біз мәдениетті, таза ұлтқа айналуымыз керек. Сонда ғана күллі әлемге таныламыз, – деді ол.
Бұған дейін Қасым-Жомарт Тоқаев биліктегі жас кадрлардан не күтетінін айтқан еді.
