Шымкент мұнай өңдеу зауытында электр қуатының берілуі бұзылып, соның салдарынан қондырғылардың бірі тоқтап қалды, деп хабарлайды Ulysmedia.kz.
Зауыт тұрақты электр қуатынсыз қалды
Ақау Шымкент мұнай өңдеу зауыты электр қуатын алатын сыртқы электр желісінде болған. Кернеудің күрт төмендеуінен мұнай өңдеуге қатысатын жабдықтардың бірі тоқтаған.
«ҚазМұнайГаз» компаниясы төтенше жағдайды растады.
– «KEGOC» АҚ-ның 220 кВ сыртқы электрмен жабдықтау көзінен кернеу төмендеді. Электр қуатының берілуі қалпына келтірілді. Қазір технологиялық қондырғылардың бірін қайта іске қосу жұмыстары жүргізіліп жатыр, – деп хабарлады компания.
Зауыттағы қалған өндірістік нысандардың жұмысын тоқтатпауға мүмкіндік болған.
Отын өндірісі тоқтаған жоқ
Бір қондырғының тоқтап қалуына қарамастан, зауыт жұмысын жалғастырып жатыр. ҚМГ мәліметінше, болған жағдай мұнай өнімдерін тәуліктік өндіру көлеміне әсер етпеген. Өнімдерді жөнелту де штаттық режимде жүріп жатыр.
Компания сондай-ақ мұндай ақаулардың кәсіпорында орнатылған автоматты жүйелер арқылы барынша азайтылуға тиіс екенін атап өтті.
– Мұндай жағдайлардың әсері зауытта орнатылған автоматика және апатқа қарсы қорғау жүйелері арқылы барынша азайтылады, – деп мәлімдеді ҚМГ.
Қазір мамандар тоқтап қалған қондырғыны қайта іске қосу жұмыстарын жүргізіп жатыр.
