Жезқазған тұрғындары коммуналдық түбіртектерден айына қосымша 1350 теңге есептелгенін байқаған. Төлем құжатында екі жаңа қызмет пайда болған: апаттық қызмет көрсетуге 700 теңге және «Сантехника үйі» үшін тағы 650 теңге, деп хабарлайды Ulysmedia.kz.
Оқиғаның мән-жайы
Жаңа төлем жолдарына қала тұрғыны Валерий Фомин назар аударған. Оның айтуынша, тұрғындар бұл ақшаның нақты не үшін алынатынын және неге жеке келісімсіз қосылғанын түсінбей отыр.
Қосымша төлемдерді, оның айтуынша, «Аман С.М.» компаниясы есептеп отыр. Фомин тұрғындардың бұл компаниямен жеке келісімшарт жасамағанын және мұндай қызметтерді қосуға алдын ала келісім бермегенін айтады.
Сондай-ақ, ол неге төлем мөлшері барлық тұрғынға бірдей екенін және пәтердің аумағына қарай өзгермейтінін сұраған.
Әкімдік не деді?
Жарияланымнан кейін Жезқазған әкімдігі «Аман С.М.» компаниясы меншік иелері МИБ құрмаған немесе басқарудың басқа түрін таңдамаған үйлерге уақытша басқарушы ұйым ретінде бекітілгенін түсіндірді.
Билік әр тұрғынмен жеке келісім жасалмағанын да растады. Төлем есептеуге уәкілетті органның бұйрығы негіз болған.
Әкімдік мәліметінше, компания мұндай үйлерге шамамен үш жылдан бері қызмет көрсетіп келеді.
Алайда Фомин бұл түсініктемені жеткіліксіз деп санайды. Ол бұйрықтың өзін, уақытша басқаруға берілген үйлер тізімін, компаниямен жасалған келісімді, оның міндеттерін және қызмет құнының қалай есептелгенін көрсетуді сұрап отыр.
Тұрғындар 700 теңгелік апаттық қызметке нақты не кіретінін және «Сантехника үйі» деген жолдағы 650 теңге үшін қандай қызмет көрсетілетінін де білгісі келеді.
Ulysmedia.kz редакциясы бұл мәселеге қатысты қала әкімдігінен бөлек пікір сұрады.
