Қазақстанның Азия ойындарындағы алтын жүлдесі Қытайға өтті

Жарыс 27 қыркүйекте өтті. Тоқсанбаева 42,195 шақырымды 3 сағат 22 минут 20 секундта жүріп өтіп, қарсыластарынан айқын басым түсті. Алайда кейін оның нәтижесіне наразылықтар түскен.

Қазақстан Ұлттық Олимпиада комитетінің түсіндіруінше, халықаралық World Athletics федерациясы спортшының аяқкиімін тексерген. Оның кроссовкасы жарыста қолдануға рұқсат етілген жабдықтар тізіміне кірмеген.

Тексерістен кейін Азия ойындарының ұйымдастыру комитеті қазақстандық спортшыны жарыстан шеттету туралы шешім шығарды.

Тоқсанбаева бұл туралы Instagram-парақшасында растады.

- Бұл үшін кешірім сұраймын. Алтын медаль сыйлағым келді. Бірақ Алланың жазғаны болады. Бұл жағдайға бола арманымнан бас тартпаймын. Нәтижем жойылды. Аяғына дейін күрестік, - деп жазды спортшы.

Ол өз командасына және өзі үшін аяғына дейін күрескендердің бәріне алғыс айтты.

- Мен үшін аяғына дейін күрескен барша «суперқаһарманыма» рақмет! Жеке бапкерімнен бастап, Қазақстан жеңіл атлетика федерациясының бүкіл құрамына, тіпті спорт министріне дейін қолдау көрсетті. Бүгін мені мың бөлшекке бөлінгендей болдым, - деп жазды Тоқсанбаева.

Қазақстандық спортшы жарыстан шеттетілгеннен кейін алтын медаль қытайлық Данцзин Цюйцзунға бұйырды. Күмісті оның отандасы Ли Ма алса, қола жүлде жапониялық Юкико Уменоға берілді.

Осыдан кейін Қазақстан құрамасының еншісінде тоғыз алтын медаль қалды. Жалпы командалық есепте Қазақстан бесінші орында тұр.

Контекст

Бұған дейін Ulysmedia.kz Тоқсанбаеваның жеңісі туралы хабарлаған еді.

21 жастағы спортшы ең жақын қарсыласын төрт минутқа жуық уақыт айырмасымен артта қалдырған.

Бұл Қазақстан үшін Азия ойындарындағы әйелдер арасындағы спорттық жүрістен алғашқы алтын жүлде болуға тиіс еді.

Бұған дейін қазақстандық спортшылар бұл сайыста екі рет қола медаль жеңіп алған. Светлана Толстая 1998 жылы Бангкокта және 2002 жылы Пусанда жүлдегер атанған.