Қазақстан, Түркия, Әзербайжан, Өзбекстан, Қырғызстан және Моңғолия ғалымдары Алтын Орда, Жошы ұлысы мен Дала өркениетінің тарихын бірлесіп зерттеуге келісті. Осы мақсатта алты елдің ғылым академиялары халықаралық консорциум құрмақ, деп хабарлайды Ulysmedia.kz.
Тиісті келісімге 16 қазанда Қазақстанның бастамасымен өткен Түркі әлемі ұлттық ғылым академиялары одағының отырысында қол қойылды.
Алты елдің зерттеушілері Еуразия аумағында өмір сүрген мемлекеттердің тарихын, көне заңдарды, дипломатиялық қатынастарды, сауда жолдары мен халықтар арасындағы мәдени байланыстарды зерделемек.
Сондай-ақ, бірлескен археологиялық экспедициялар ұйымдастырып, көне қолжазбаларды зерттеу, тарихи құжаттардың цифрлық мұрағатын және интерактив тарихи атлас жасау жоспарланып отыр.
Жиналған деректерді өңдеуге жасанды интеллект пен геоақпараттық технологиялар қолданылмақ.
Бұдан бөлек, елдер тарихи дереккөздермен алмасып, бірлескен ғылыми еңбектер жариялауды және зерттеу жұмыстарына жас ғалымдарды тартуды көздеп отыр.
Қазақстан Ұлттық ғылым академиясының президенті Ақылбек Күрішбаев келісім жасаумен шектелмей, нақты нәтижеге қол жеткізетін ортақ ғылыми жобаларды қолға алуды ұсынды.
Осы мақсатта 2027–2031 жылдарға арналған жол картасын әзірлеу жоспарланған.
Құжатта зерттеудің негізгі бағыттары, тарихи материалдармен алмасу тәртібі және ғалымдардың бірлесіп жұмыс істеу мүмкіндіктері айқындалмақ.
