Халықаралық қауымдастық Қара теңіз арқылы кеме қатынасы мен астық тасымалының қауіпсіздігін қамтамасыз етуге бағытталған келісімдерге қол жеткізуге мүдделі болып отыр. Бұл туралы АҚШ мемлекеттік хатшысы Марко Рубио Атлантада өткен G20 жиынының қорытынды баспасөз мәслихатында мәлімдеді. Бұл туралы оқиға орнынан Ulysmedia.kz тілшісі хабарлайды.
Журналистердің бірі АҚШ-тың бас дипломатынан астық тасымалының қауіпсіздігін қамтамасыз ету үшін Ресей мен Украина арасында ішінара болса да атысты тоқтату жөнінде ілгерілеушілік бар-жоғын сұрады.
Рубио бұл бағытта әзірге айтарлықтай нәтижеге қол жеткізілді деп айта алмайтынын жеткізді. Дегенмен оның сөзінше, бірқатар мемлекет тиісті келісімдерді әзірлеу кезінде кепілгер немесе араағайын болуға қызығушылық танытып отыр.
«Мұны ілгерілеушілік күшейіп келеді деп бағаламас едім», – деді мемлекеттік хатшы.
Ол халықаралық қауымдастықтың әзірге нақты шешімге қол жеткізуге мүдделілік танытып отырғанын ғана атап өтті.
Қара теңіздегі кеме қатынасының қауіпсіздігі Ресей мен Украина үшін ғана емес, әлемдік азық-түлік нарығы үшін де маңызды. Астық пен басқа да ауыл шаруашылығы өнімдерін тасымалдауға қойылған шектеулер азық-түлік импортына тәуелді мемлекеттерге кері әсер етуі мүмкін.
G20 жиынында бұл мәселені Еуропа өкілдері де көтерді. Польша сыртқы істер министрі Радослав Сикорский Украина мен Ресейден астықты қауіпсіз жеткізуді қамтамасыз ету үшін Қара теңізде атысты тезірек тоқтатуға шақырды.
Польша министрі азық-түлік жеткізілімінің тұрақтылығы айрықша маңызды саналатын жаһандық Оңтүстік елдерінің мүддесін де ескеру қажеттігін атап өтті.
Рубионың мәлімдемесі Ресей мен Украина Қара теңіздегі атысты тоқтату туралы келісімге қол қоюға жақындады дегенді білдірмейді. Мемлекеттік хатшы ықтимал бітімге қол жеткізудің нақты мерзімін атаған жоқ. Сондай-ақ халықаралық кепілдіктер берудің ортақ тетігі келісілгені туралы да хабарламады.
Сонымен бірге ол кеме қатынасының еркіндігі, энергетикалық және азық-түлік қауіпсіздігі G20 елдері бірлесіп шешім іздеуі тиіс маңызды мәселелердің қатарында екенін айтты.
Осылайша, Қара теңіздегі бітім бастамасы әзірге қол жеткізілген келісім емес, дипломатиялық талқылау тақырыбы болып қалып отыр.
