7-9 қараша аралығында Қазақстан аумағы арқылы екі циклон өтеді. Елдің басым бөлігінде жаңбыр мен қар жауады. Солтүстік-батыс пен солтүстікте көктайғақ болады. Ал оңтүстік өңірлерде күн жылып, ауа температурасы +27 градусқа дейін көтеріледі, деп хабарлайды Ulysmedia.kz.
Әуелі елдің солтүстігі арқылы солтүстік циклон өтеді. Ал 8 қарашадан бастап оңтүстік циклон бүкіл ел аумағына таралады. «Қазгидромет» болжамына сәйкес, республика бойынша жел күшейіп, түнде және таңертең тұман түседі.
Қай өңірлерде жауын-шашын күшейеді
8 қарашада батыста қатты жаңбыр жауады. 9 қарашада солтүстік-батыс пен батыста жаңбыр аралас қар жауып, оңтүстікте күндіз нөсер жаңбыр болады.
Ауа температурасы
Батыс өңірлерде күн суытады. Түнде ауа температурасы -8 градустан +3 градусқа дейін, күндіз +2...+10 градус аралығында болады.
Солтүстік-батыста күндіз ауа температурасы айтарлықтай төмендеп, -3...+5 градус шамасында болады. Түнде -6 градустан +3 градусқа дейін өзгереді.
Шығыста күн жылынады. Түнде -5...+8 градус, күндіз +9...+17 градус болады.
Ең жылы ауа райы оңтүстікте сақталады. Түнде +7...+17 градус, күндіз +18...+27 градусқа дейін көтеріледі.
Оңтүстік-шығыста түнде +7...+15 градус, күндіз +17...+25 градус болады. Таулы аймақтарда түнде 0...+5 градус, күндіз +10...+15 градус шамасында болады.
Елдің қалған өңірлерінде ауа температурасы айтарлықтай өзгермейді.
