Жоғары аудиторлық палата өкілдері елдегі жол сапасын жақсартуға бағытталған жобаларға бөлінген қаражатты игерудегі кемшіліктерді анықтады, деп хабарлайды Ulysmedia.kz.
«Нарықтың отандық жол-құрылыс материалдарымен жеткілікті толықтырылмауы, битум сапасының нашар болуы және жолдарды салу мен жөндеудің өзіндік құнына әсер ететін жүк вагондарының жетіспеушілігі бар. Мысалы, 2021 жылы Ұлттық сапа орталығы жол битумының 1400-ден астам сынамасын зерттеген. Оның 300-і сапасы бойынша нормативтердің талаптарына сәйкес келмейді», - делінген палатаның ақпаратында.
Аудиторлар дерегінше, Павлодар мұнай-химия зауытының 183 сынамасы, Caspi Bitum-ның 108 сынама, «Қазақбитумның» 7 сынамасы бар.
«Салдарынан асфальт-бетон жабыны тез бұзылады, қызмет көрсетудің кепілдік мерзімі қысқарады», - деп жазылған құжатта.
Айта кетейік, бұдан бұрын жол құрылысына бөлінген қаржыны миллиардтап жымқырған шенділердің үстінен 29 іс қозғалғаны хабарланған.
