Мамыр айында Қазақстанда іскерлік белсенділік аздап төмендеді. Оның басты себебі – жеткізу мерзімінің ұзақ болуы, деп хабарлайды Ulysmedia.kz.
Бұл туралы ҚР Ұлттық банкі Ақша-несие саясаты департаментінің директоры Рүстем Оразалин мәлім етті.
Оның айтуынша, мамыр айында іскерлік белсенділік аздап бәсеңдеді, бірақ оң аймақта қалды. Бұл ретте ол қызмет көрсету саласында ең жоғары, ал тау-кен өнеркәсібінде ең төмен болған.
«Көрсеткіштің жақсаруы тек өндірісте байқалды, онда индекс 50,2 (сәуірде – 49,4) оң аймаққа өтті. Қызмет көрсету саласында да іскерлік белсенділік индексі 51,1-ге дейін шамалы төмендегенімен (сәуірде – 51,8) оң аймақта. Құрылыс және тау-кен өнеркәсібінде іскерлік белсенділіктің сәйкесінше 49,6-ға (сәуірдегі 49,9-дан) және 49,5-ке (сәуірдегі 49,8-ден) дейін аздап төмендеуі байқалды. Тау-кен өнеркәсібіндегі көрсеткіштің динамикасына тауарлы-материалдық қорлар көлемінің төмендеуі әсер етті», - деді Оразалин.
Құрылыста, жаңа тапсырыстардың көбеюіне қарамастан, жеткізу уақытының ұзағырақ болуына және жұмыспен қамту деңгейінің төмендеуіне байланысты бұл көрсеткіш кеміді.
