×
472.68
466.91
8.01
#қаңтар қақтығысы #Ресей-Украина соғысы #әкімге үш сұрақ #лот ашар #кибербуллинг #жаңа облыстар #коронавирус #hi-tech
472.68
466.91
8.01

Ақшолақов: Бізде мұнай сату үшін КТК-дан тыс балама бағдар табудан басқа амал жоқ

03.08.2022, 13:07
Коллаж: ulysmedia.kz.

Энергетика министрі Болат Ақшолақов Қазақстан мұнай өндірісін 2024 жылы арттыратынын, тиісінше Каспий құбыр концорциумынан басқа балама жолдарды табудан басқа амал жоқтығын мәлімдеді, деп хабарлайды Ulysmedia.kz.

«Бірден айтайын: баламалы бағдарлар мәселесін біз жаңа бағдарлар немесе экспортты әртараптандыру ретінде қарастырамыз. Иә, біз кейінгі кездегі тасымалдың жиі шектелуіне (КҚК-ға байланысты – авт.) байланысты балама бағдарларды қарастырып жатырмыз. Оған қоса 2024 жылдың ортасына дейін Қазақстанда мұнай өндірісін қазіргі 85-87 млн тоннадан 100 млн тоннаға дейін арттыруды көздеп отырмыз. Одан ары 130 млн тоннадан 170 млн тоннаға дейін көбейткіміз келеді. Сол себепті балама бағдар мәселесін бізге шешуден басқа амал қалмайды», - деді министр Орталық коммуникациялар алаңында өтіп жатқан баспасөз мәслихатында.

Оның айтуынша, Қазақстан логистикалық, көліктік мүмкіндіктерін арттыруы керек. Бұл тұрғыда Каспий құбыры желісі бәрібір де бүгінгі таңда тиімді бағдар болып қала беретінін де жеткізеді министр. Дегенмен тасымал артатындықтан, әртараптандыру мәселесін қарастыру керек.

«Екі негізгі бағытты қарастырамыз. Оның бірі – шығысқа, яғни Қытай тасымалды арттыру. Егер олар мұнайды сатып аламыз десе... Екіншісі – Каспий арқылы тасымалдау. Теңіз жолы арқылы тағы да Иранға да жеткізуге болар. Бірақ ол жақта 5 млн тоннаға дейін ғана тасымалдауға болатын шығар. Бірақ қазір оны іске асыру қиын. Дегенмен де ол да бір амал», - деді ол.

Еске сала кетсек бұған дейін Новороссийскінің Приморский аудандық соты экологиялық заңбұзушылықтарға байланысты Каспий құбыр консорциумының (КҚК) қызметін тоқтатып тастаған болатын. Консорциум қызметі 5 шілдеден бастап 30 тәулікке тоқтаған. Алайда бұл шешім кейін күшін жойды. Оның алдында да Ресей билігі әртүрлі себеппен желі жұмысын тоқтатуға күш салған.

Үкімет басшысы Әлихан Смайылов Каспий құбыр консорциумы қызметінің уақытша тоқтап қалуына байланысты жедел кеңес өткізген болатын. Қазақстан билігі КҚК жұмысының жиі тоқтауына байланысты кейінгі кездері мұнай тасымалдаудың қосымша балама жолдарын қарастырып жатыр.