Астана әкіміне қаланың шиеленіскен мәселелерін шешуге бір жыл уақыт берілді

Қасым-Жомарт Тоқаев бес бағыт бойынша тапсырма берді:

• орнықты жылу жүйесімен қамтамасыз ету;
• сумен қамтамасыз ету мәселесін шешу;
• тұрғын үй құрылысын ретке келтіру;
• астананың бірыңғай сәулеттік келбетін қалыптастыру үшін шаралар қабылдау;
• өмір сүру сапасын жақсарту.

«Ең алдымен, бүгін айтылған міндеттерді дер кезінде әрі сапалы орындау керек. Астана бас қала деген атауға лайық болуға тиіс. Астана көркейсе, бүкіл еліміздің еңсесі биік болады. Астана Әділетті Қазақстанды құру жолында түбегейлі өзгерістерге ұйытқы болуы керек. Жалпы, қаланың күнделікті тыныс-тіршілігі ұдайы назарда болуға тиіс. Әкімге қаланың ахуалын жақсы жағына қарай өзгерту үшін бір жыл уақыт беремін. Сіздің жұмысыңыз менің бақылауымда болады. Барлық қажетті көмекті көрсетеміз. Бірақ жұмыстың негізгі өзегі – сіздің қолыңызда», – деді президент.

Айта кетейік, бұдан бұрын Тоқаев қаланы сумен қамту мәселесін шеше алмаған экология министрінің жұмысына шүйліккен.