Атырауда кәріз коллекторындағы ақаудан бір шағын аудан сусыз қалды, деп хабарлайды Ulysmedia.kz.
Атырау қалалық әкімдігі баспасөз қызметінің мәліметінше, Балықшы шағын ауданындағы кәріз коллекторында ақау анықталған.
«Балықшы шағын ауданында кәріз коллекторында ақау шықты. Осыған байланысты аталған шағын ауданда 20 шілдеге қараған түні сағат 00:00-ден таңғы сағат 06:00-ге дейін су беру уақытша тоқтатылады», – делінген хабарламада.
Ал, Атырау облысының энергетикалық кешені баспасөз қызметінің ақпаратына қарағанда, 20 шілдеде Балықшы ауданында электр жарығын ажырату жоспарланып отыр.
«Жергілікті уақытпен сағат 08:00-19:00 аралығында «Атырау облысы Су Арнасы» КМК қызметкерлерінің Балықшы ықшам ауданында апатты қалыпқа келтіру жұмыстары кезінде Қожақаев көшесінде орналасқан №21, Бейбітшілік көшесінің №62 мекенжайдағы көппәтерлі үйде электр жарығы уақытша болмайтынын қаперге береміз», -деп мәлім етті энергетикалық кешеннің баспасөз қызметі.
Айта кетсек, бұдан бұрын аптап ыстық пен қатты жел салдарынан Орал қаласының бірнеше ауданы жарықсыз қалған еді.
