Талдықорған қалалық соты қаруды ұрлау, заңсыз сатып алу, сақтау фактісі бойынша айыпталған 6 адамға үкім шығарды, деп хабарлайды Ulysmedia.kz.
Сотта 2022 жылы қаңтардың 5-нен 6-на қараған түні екі ер адам полиция департаментінің ғимаратынан атыс қаруы мен оқ-дәрілерді ұрлап, кейін олардың бірі өзінің екі танысын қару сатуға көндіргені анықталған. Таныстары қару мен оның керек-жарақтарын сатып алатын екі адамды тапқан. Сот процеске қатысты сотталушылардың атын атамайды. Есімдерінің бас әрпін ғана көрсетеді.
«Биыл 18 қаңтарда екі сотталушы сатып алушымен кездесіп, оған 1 млн теңгеге 2 автомат пен патрондары бар карабин сатып алуды ұсынған. Сол күні кешке оларды полиция ұстады», - делінген сот мәліметінде.
Сотталушылар өз кінәсін толық мойындап, өкінетінін айтқан. Алты айыпталушының әрқайсысына 3 жылға бас бостандығынан айыру жазасы тағайындалды.
Айта кетейік, Алматыда 14 қыркүйекте Арман Жұмагелдиев пен Қайрат Құдайбергеннің соты басталды. Іс бойынша 42 адамға қаңтардағы тәртіпсіздіктерге қатысты немесе ұйымдастырды деген айып тағылған.
