Соңғы уақытта бірқатар сыртқы және ішкі факторлар теңгенің әлсіреуіне ықпал етті. Қыркүйек айының басынан бастап теңге/доллар бағамы 4,5%-ға төмендеді. Ұлттық банк төрағасының орынбасары Әлия Молдабекова мұнайдың бағасының қымбаттығына қарамастан ұлттық валютаның әлсіреуі немен байланысты екенін түсіндірді, деп хабарлайды Ulysmedia.kz.
Ұлттық банк басшысы орынбасарының айтуынша, теңгенің құнсыздануына ықпал еткен бірінші фактор – АҚШ долларының жаһандық нығаюы болды. Қыркүйектің басынан бастап АҚШ долларының дамыған елдердің валюталарына қарсы динамикасын көрсететін DXY индексі 2,9%-ға, ал дамушы елдердің валюталар себетіне қарсы доллар 2,6% -ға күшейе түсті.
Банк доллардың өсуі нарықтағы болжамдарға байланысты екенін түсіндірді: жыл соңына дейін ФРЖ мөлшерлемесі тағы бір көтерілуі мүмкін және ФРЖ жоғары мөлшерлемесі ұзақ уақыт сақталады.
Ұлттық банк теңге/доллар бағамына импорттаушылар тарапынан валютаға сұраныстың өсуі де әсер еткенін атап өтті. Бұл жобаларды іске асыру циклін жандандыруға және бюджет қаражатын игеруге байланысты "маусымдық" сұраныс деп аталады.
Үкіметтің квазимемлекеттік сектордың экспорттық валюта түсімінің бір бөлігін сату жөніндегі міндеттемесін тоқтата тұруы – Ұлттық банк атаған тағы бір фактор.
"Норма тоқтатылғанға дейін экспорттаушылардың міндетті сатуы нарықта валюта ұсынысының тұрақты көлемін құрады, орташа есеппен айына 220-дан 420 млн долларға дейін. Бұл теңге бағамын тұрақтандырды", - деп атап өтті Молдабекова.
Ұлттық банк мұнай бағасы және төлем балансының жалпы жағдайы сияқты іргелі факторлар теңгенің құнсыздануына жол бермей, ішкі валюта нарығындағы теңгерімді арттыратынына сендірді. Сонымен қатар Ұлттық банк басшысының орынбасары банк валюта нарығындағы өтімділікті қолдау және айырбас бағамының күрт ауытқуын болдырмау үшін валюталық интервенциялар жүргізу құқығын сақтап қалатынын еске салды.
Айта кетейік, бұдан бұрын Ұлттық банк басшысы теңгенің әлсіреу себебін түсіндірген.
