Біріккен Корольдіктегі жасы шамамен 300 жыл болатын ең әйгілі ағаштардың бірі бейсенбіге қараған түні кесілді, деп хабарлайды Ulysmedia.kz euronews-ке сілтеме жасап.
Британ полициясы 16 жасар жасөспірімді ЮНЕСКО-ның дүниежүзілік мұралар тізіміне енгізілген тарихи Хадриан қабырғасының маңындағы иконалық ағашты кесіп тастады деген күдікпен қамауға алды.
Англияның солтүстігіндегі Нортумберленд ұлттық саябағында 300 жылдан бері үлкен ақ үйеңкі ағашы өсіп тұрған. Ол 1991 жылы Кевин Костнер ойнаған «Робин Гуд: Ұрылар ханзадасы» фильмі шыққаннан кейін бүкіл әлемге танымал болды. Көптеген туристер елдің басты көрікті жерлерінің бірін көру үшін Sycamore Gap-ге ағылды. Бұл сонымен қатар билік өкілдерінің айтуынша, ағашты «қадірлеп, жақсы көретін» жергілікті тұрғындар үшін танымал демалыс орны. Ол 28 қыркүйек, бейсенбіге қараған түні кесілген. Полиция бұл оқиғаны «қасақана жасалған бұзақылық әрекет» деп атады.
Шабуыл жасаушының қандай мақсатта болғаны әзірге белгісіз.
"Бұл – әлемге әйгілі көрнекті орын. Бүгінгі оқиғалар жергілікті қауымдастық пен жұртшылық арасында күйзеліс, қайғы мен ашу тудырды", - деді полиция бастығы Кевин Уоринг.
Сондай-ақ саябақ өкілдері өсімдіктің одан әрі тіршілігін қамтамасыз ету үшін қолдан келгеннің бәрін жасайтындықтарын, тұқым жинап, көшеттерді қайта отырғызатынын жеткізді.
