«Ақылы 13 жастағы баламен тең»: депутат Бәшімов ресейлік депутат Федоровқа жауап берді

«Әріптестер, біз тағы да Мемлекеттік Думаның кейбір депутаттарының Қазақстанға қатысты жағымсыз мәлімдемелерін көріп отырмыз. Егемендігіміз бен аумақтық тұтастығымыз туралы жалған, арандатушылық мәлімдемелерімен танылып үлгерген депутат Федоров тағы да себепсіз айқайлауды жөн көрді.

Біріншіден, ол сепаратизм үшін лайықты түрде сотталған «Петропавл халықтық кеңесі» деп аталатын жиынға қатысушылардың үкіміне түсініктеме берді.

Екіншіден, ол Қазақстанды «толық құқықтық сипаттағы аумақ» деп атады. Ол еліміздің барлық қажетті процедураларды орындамай, тәуелсіздік алғанын алға тартады.

Федоровтың сөзі тарихқа қайшы келеді. Ол фактілерді дөрекі түрде қолданып, КСРО-ның ыдырау процесі қалай өткені туралы әдейі үнсіз қалады. Сонымен бірге Федоров өз президентінің ресми саясатына қарсы. Қазақстанға соңғы сапары барысында Владимир Путин Қазақстан-Ресей серіктестігі өзара құрмет, егемендікті, аумақтық тұтастықты тану және ішкі істерге араласпау қағидаттарына негізделгенін атап өткен еді», – деді депутаттық сауал кезінде сөз алған мәжіліс депутаты.

Ол заңгер ретінде Ресейдің заң шығарушы тармағы өкілдерінің мұндай пікірлерін орынсыз деп санайтынын айтты.

– Олар ең алдымен Ресейдің біздің негізгі және стратегиялық серіктесіміз ретіндегі ұстанымына нұқсан келтіреді. Федоровтың және оған ұқсас басқалардың барлық психологиялық жарақаттары БАҚ пен парламентте емес, психологтың кабинетінде шешілуі керек.

Егемендік туралы Декларация жарияланғаннан бері Қазақстан БҰҰ Жарғысын ұстанатын және негізгі халықаралық ұйымдардың мүшесі болып табылатын күшті және тәуелсіз мемлекет құрды. Біздің мемлекет барлық көршілерімен шекарасын толығымен делимитациялады. Біз тәуелсіздік алып, халықаралық деңгейде танылдық.

Мен ресейлік әріптестерімді өте нәзік саяси тақырыптарда сөз қозғамас бұрын ойлануға шақырамын. Бұрынғы ортақ кеңестік кешегі туралы естеліктеріңіз тек тарих кітаптарында ғана қалды, – деді Бәшімов.

Оралхан ҚОЖАНОВ