Өте күмәнді – СІМ Зеленскийдің сұхбаты жайлы пікір білдірді

Смадияровтың жауабы

– Мен сыртқы істер министрлігінің баспасөз хатшысы ретінде Украина басшылығының сұхбатына түсініктеме бергім келмейді. Бірақ мұны біз елемей қалдыра алмаймыз және өзіміздің реакциямызды білдіру керек деп есептейміз. Бізде бар ақпарат бойынша украиналық тарап бұл жобаға өз қалауымен бастамашылық жасап, сіз айтқан сұхбатты өткізу үшін Қазақстанның бірқатар жеке БАҚ өкілдерін Киевке шақырған болатын. Қазақстан СІМ желісі бойынша ресми дипломатиялық арналар арқылы бұл ақпарат өткен жоқ. Жалпы бұл сұхбатты өткізу – бізге өте күмәнді болып көрінеді. Сұхбат рационалды емес, эмоционалды болып шықты. Одан гөрі Украинаның БАҚ-тары арқылы Қазақстан аудиториясына жүгіну оңайырақ болар еді, – дейді Айбек Смадияров.  

Зеленский не деді

24 мамырда Украина президенті Владимир Зеленский Харьковтағы Ресей әскерлері бомбалаған баспаханада  Орталық Азиядан келген журналистерге брифинг өткізген еді. 

15-16 маусымда Швейцарияда өтетін Бейбітшілік Саммиті қарсаңында Украина президенті әкімшілігі ұйымдастырған іс-шара Орталық Азия елдерінің басшыларын саммитке шақыру сияқты көрінді. Алайда, дипломатия тұрғысынан Зеленскийдің Қазақстан, Қырғызстан және Өзбекстан президенттерінің Кремльге қатысты "әлсіздігін"  айыптай сөйлегені тосын естілді.

“Сіздердің көшбасшыларыңызда тепе-теңдік жоқ,” - деп түсіндірді Зеленский өз ұстанымын.

- Неге екенін түсіндірейін. Біз бейбітшілік саммитін өткіземіз. Біз соғысқа емес, бейбітшілікке алғашқы қадамдарды жасаймыз. Олар кішкентай баланың қадамы сияқты -тұрақсыз, бірақ дұрыс. Олардың қолдауы біз үшін маңызды. Біз барлығын, соның ішінде Орталық Азия көшбасшыларын да шақырдық. Мұнда тұрған қорқатындай не бар? Тек бір нәрсе қорқынышты – Путин болмайды.

Владимир Зеленский журналистерге өз елдерін Украинаның орнына қою арқылы жағдайды гипотетикалық түрде модельдеуді ұсынды.